Россиянинг Челябинск шаҳрида таэквондонинг олимпия ўйинлари дастуридан ўрин олган ВТФ йўналиши бўйича жаҳон чемпионати якунланди. Кеча мусобақанинг сўнгги кунида сўнгги медаллар жамланмаси ўз эгаларига топширилди.

Мусобақанинг сўнгги куни даянга чиққан 80 кг вазн тоифасидаги Максим Рафалович совриндорлар сафидан жой ола билмади. Шундай бўлсада, якунда 1 та олтин, 2 та кумуш медалини қўлга киритган Ўзбекистон терма жамоаси умумжамоа ҳисобида 4-ўринни эгаллади. Бунақаси ҳали ўзбек таэквондо тарихида бўлмаганди.

Таъкидлаш жоиз, Максиминг укаси Никита Рафалович мусобақанинг иккинчи кунги баҳсларида 74 кг вазн тоифасида кумуш медални қўлга киритганди. Икки кун аввал Дмитрий Шокин жаҳон чемпионатининг олтин, Жасур Бойқўзиев эса кумуш медали билан тақдирланган эди.

Эслатиб ўтамиз, ушбу жаҳон чемпионатида дунёнинг 141 давлатидан келган энг кучли даян усталари ғолиблик ва шу билан бирга Рио-2016 Олимпия ўйинларининг муҳим рейтинг очколари учун баҳс олиб боришди.

Умумжамоа ҳисобида биринчи ўрин Жанубий Корея терма жамоаси эгаллади. Ушбу спорт тури вакиллари 4та олтин, 1та бронза медалини қўлга киритишди. 3та олтин, 2та бронза медалига эгалик қилган Эрон терма жамоаси иккинчи, 2та олтин, биттадан кумуш ва бронза медали билан тақдирланган Туркия терма жамоаси кучли учликка якун ясади.

Ана шу 4та терма жамоадан ташқари, шунингдек, Хитой Тайпейи, Буюк Британия, Бельгия, Таиланд, Озарбайжон ва Япония терма жамоалари ҳисобида ҳам бир нафардан жаҳон чемпиони бор. Умуман олганда, 150га яқин давлатдан 28таси ўз юртига камида битта бронза медали билан қайтди.

Яна бир бор таъкидлаб ўтамиз, ушбу жаҳон чемпионати Ўзбекистон таэквондоси тарихида янги саҳифани очди. Дмитрий Шокин айни пайтда таэквондонинг ҳам ITF, ҳам WTF йўналишида жаҳон чемпиони бўлган юртимиздаги ягона спортчига айланди. У бу сафар энг кўп 120 рейтинг очкосига эга бўлди.