Ўзбекистон ёшлар (U20) терма жамоаси бугун Панама билан ўртоқлик учрашувини ўтказиб, 1:2 ҳисобида мағлуб бўлгани ҳақида хабар бериб ўтгандик.
Ўзбекистон футбол федерациясининг қайта хабар тарқатишича, мазкур ўйинда аслида 2:2 ҳисобидаги дуранг қайд этилган.
"Техник муаммо сабаб Ўзбекистон ёшлар терма жамоасининг Панамага қарши ўйинда мағлубиятга учраганлиги ҳақидаги хабарни эътиборсиз қолдирасиз. Янги Зеландиядан алоқага чиққан Ўзбекистон ёшлар терма жамоаси мураббийлар штабига кўра, ўйин 2-2 ҳисобидаги дуранг билан якун топган. Шу муносабат билан 1-2 ҳисобидаги мағлубият ҳақида ёзилган твитни инобатга олмайсиз. Ноқулайлик учун узр сўраймиз", - дейилади хабарда.
Ўзбекистон ёшлар терма жамоаси сафида голларга Сардор Азимов ҳамда Элдор Шомуродовлар муаллифлик қилишган.
Учрашувдан сўнг иккала томоннинг ўзаро келишувига кўра терма жамоалар пенальтилар сериясида ўзаро баҳс олиб боришди. Ушбу баҳсда Ўзбекистон ёшлар терма жамоаси 5:3 ҳисобида устун келди.
Маълумот учун Ўзбекистон U-20 ёшлар терма жамоаси Велингтон шаҳрида 28 май кунигача тайёргарлик олиб боришади ва шундан сўнг Жаҳон чемпионати гуруҳ учрашувларини ўтказиш учун Крайстчертч шаҳрига учиб кетади.
Эслатиб ўтамиз, Ўзбекистон ёшлар терма жамоаси Жаҳон чемпионатидаги биринчи учрашувини 1 июнь куни Гондурас ёшлар терма жамоасига қарши ўтказади.
Ўртоқлик учрашуви.
24 май. Велингтон, Янги Зеландия.
Ўзбекистон (U-20)– Панама (U-20) - 2:2
Голлар: Сардор Азимов, Элдор Шомуродов.
Қуйида берилаётган видеолавҳада пенальтилар серияси акс эттирилган.
