Кеча “Локомотив” – “Қўқон-1912” жамоалари қарама-қаршилиги билан олий лигада 10-тур учрашувларига якун ясалди.
“Темирйўлчилар”нинг кичик ҳисобдаги ғалабалари билан тугаган учрашув борасидаги Лутфулло Тўраевнинг фикрлари билан қизиқдик.
- Кечаги учрашув осон кечмади. “Қўқон-1912” ҳам бизга жиддий қаршилик кўрсатди. Қўқонликлар олий лигага шу мавсумда қўшилишган бўлишса-да, ушбу жамоанинг ўйини анча шаклланиб қолибди. Бунга кечаги ўйинда гувоҳ бўлдик. Лекин якунда омад биз тарафда бўлди ва ғалабага эриша олдик.
Шу ўринда таъкидлашим лозимки, бизнинг жамоа учрашувларда жуда кўплаб қулай вазиятларни вужудга келтирмоқда. Аммо имкониятлардан унумли фойдаланиш борасида бироз оқсаяпмиз. Шу сабабли ҳам баъзи учрашувларда ўзимиз истаган натижаларни қайд эта олмаяпмиз. Аммо мураббийлар штаби бу борада кўрсатмалар беришмоқда ва биз ҳам ушбу камчиликни бартараф этиш борасида ишлаяпмиз. Насиб қилса, келаси учрашувларда, албатта, кўпроқ гол киритиб, мухлисларимизни хурсанд қиламиз, - дейди тажрибали ярим ҳимоячи SPORTS.uzга.
