Бразилиялик моҳир тўпурар Жонатаснинг сермаҳсул ўйинлари камтарин «Эльче»нинг элитадаги умрини узайтирди. Демак, ана шу футболчи билан яқиндан танишиб чиқсак, арзийди.
Бундан бир неча ой муқаддам, «Эльче» ўз майдонида «Реал»ни қабул қилиш тадоригини кўраётган пайтда касбдошимиз Жонатас билан учрашиб, бўлажак беллашув, жумладан унинг Пепе ҳамда Варанга қарши тўқнашуви хусусидаги фикрларига қизиқиб кўрди. Афтидан, бразилиялик ҳужумчи шу йўсиндаги саволга аввалдан тайёргарлик кўрган шекилли, ҳеч иккиланмай жавоб қайтарди: «Улар дунёнинг энг яхши ҳимоячилари эканига шубҳа қилмайман. Бироқ мен майдонга тушган пайтимда бу фикрларни унутаман. Мен улардан яхшироқ биламан». Ҳақиқат шуки, юқоридаги ибора 25 ёшида янги савияга кўтарилган футболчининг ҳаётий ақидасини тўла-тўкис ифодалайди.
Жорий мавсум арафасида Аликантия жамоаси ўз таркибини 10 нафар янги футболчилар билан тўлдиради. «Пескара» билан шартномага имзо чеккан Жонатас ҳам шулар арафасида эди. Фақат у «Эльче»да ижара асосида тўп сурадиган бўлди. Хуллас, элитадаги ўрнини сақлаб қолишни мақсад қилган Фран Эскриба янги жамоани шакллантиришга киришди. Баланд бўйли ҳужумчини таклиф этиш бош мураббийнинг ташаббуси бўлиб, ҳужум чизиғида юзага келиши мумкин бўлган муаммоларни у аввалдан кўра олганди. Илк кунларданоқ Жонатасга тўлиқ ишонч билдирилди. Ана шу таваккал ўзини оқлади. Жамоанинг илк ғалабасини нишонлаш учун мураббийлар штаби 236 дақиқа сабр қилишига тўғри келди. Бразилиялик тўпурарнинг голи ва самарали узатмаси дастлабки 3 очкони ҳадя этди. Айни ўша дақиқалардан бошлаб шу пайтгача Италия «В» сериясида тўп суриб келган футболчи учун янги давр бошланди. Вақт ўтгани сайин Жонатас тобора «очилиб» борди. Асосий ҳужумчилар бўлмиш Ферран Короминас билан Кристиан Эррералар эса бутунлай кўринмай қолишди. Айнан шу паллада мураббий олдида янги муаммо юзага келди: Жонатаснинг сермаҳсуллиги яхши, аммо унга кўмак бера оладиган, зарур пайтда унинг ўрнини боса оладиган захирани қаердан топади?
Буни қарангки, футболчи устозини мушкул вазиятдан халос эта олди, яъни, ўзи ва ўша хаёлий захира учун ҳам тўп сурди. Юқорида зикр этилган икки етакчи эса бу давр ичида бор-йўғи 2та гол уришди... Шу тариқа Жонатас мухлислар ўртасида «Эльче»нинг рамзига айланди. Сўзимиз қуруқ бўлмаслиги учун фактларга мурожаат қиламиз: бразилиялик мерган гол урган ўйинларнинг фақат биттасида «Эльче» мағлубиятга учради. Қолган 10 учрашувнинг 7таси 3 очкодан келтирган бўлса, 3тасида жанговар дуранглар қайд этилди. Шундан келиб чиқадиган бўлсак, ажойиб барқарорликни намойиш этаётган футбол қиролининг ватандоши ҳозирда Ла-лиганинг маҳорати муносиб баҳоланмаган футболчиси бўлиб турибди. Тўғри, унинг ҳисобидаги голлар шодаси мавжуд эмас (атиги битта дубль), сериялар ҳам йўқ. Аммо барча голлари муҳим очколарни келтиради. Шу боис, Жонатас ўзининг 11 аниқ зарбаси билан «Эльче» очколарини 15тага ошириб, энг фойдали ўйинчилар сафида бормоқда. Масалан, Ариц Адурис ҳисобида 15та гол бор, бироқ «Атлетик»ка бу голлар атиги 13 очко келтирди.
Ла-лига мусобақалари поёнига етиб қолди. Энди бразилиялик элчи ўз бурчини тўлиқ адо этган ҳолда бироз тин олишга ҳақли. Гап шундаки, бундан бир неча ҳафта аввал у «Реал Сосьедад» дарвозасини ишғол этиш билан «Эльче» тарихидан жой олганди. Чунки ўша гол ҳужумчининг мавсумдаги ўнинчи тўпи бўлиб, 1978 йилдан бери жамоанинг бирорта аъзоси бу натижага ета олмаётганди.
Қолаверса, у топ-лигалардаги бразилиялик мерганлар орасида фақат Неймардан ортда қолди.
Жонатаснинг голлари эвазига олинган 15 очко «Эльче» учун қандай аҳамиятга эга эканини айтмаса ҳам бўлаверади. Улар бўлмаганида, жамоа «Кордоба»нинг тақдирига шерик бўларди. Дарвоқе, «Эльче»нинг элитадаги иштироки яна бир мавсумга узайди. Ваҳоланки, ўтган асрнинг 70-йилларидан бери жамоа мунтазам 3 мавсум кучлилар орасида бўлишни уддалай олмаётганди. Бу муваффақиятда ҳам бразилиялик тўпурарнинг хизматлари беқиёс. Айниқса, «Малага»дек жиддий рақибдан 3 очко тортиб олинишида Жонатаснинг голи ва Марио Пошаличга ассистентлик қилганлиги ҳал қилувчи роль ўйнади. Қўшимчасига, бош мураббийга ўз фаолиятини давом эттириш имкониятини берди.
Ҳужумчининг ўзи эса муваффақиятли мавсумга устози сабабчи эканлигини таъкидлайди: «Шартномани имзолаётган пайтимда у ҳақда бирор марта бўлса-да эшитмагандим. Аммо у менга тўла ишонч билдириб, кучимга куч бағишлади. Шу пайтгача Эскриба сингари ажойиб мутахассисга дуч келмагандим».
Тўғри, Жонатас «Брешия» ва «Латина» таркибларида ҳам кўпроқ голларни қайд этган. Бироқ «В» сериясини Примеро билан тенглаштириб бўлармикан? Албатта, сермаҳсул ҳужумчини сақлаб қолиш «Эльче» учун осон бўлмайди. Камтарин жамоани шатакка олишнинг уддасидан чиққан ҳужумчи кучлироқ клубларда янада самаралироқ ўйнаши аниқ. Шу боис, ҳозирда «Севилья» шахсан Унаи Эмери Жонатасга қизиқиш билдирмоқда. Қани кўрайлик-чи, ёзги трансфер Жонатас учун қандай ўзгаришларни олиб келаркин?
