Бокс бўйича супер оғир вазн тоифасида икки карра Олимпиада чемпиони Баҳодир Жалолов профессионал боксдаги навбатдаги жангини Буюк Британияда ўтказади. Ўзбекистонлик чарм қўлқоп устаси ўзининг 18-жангини 9 май куни Манчестер шаҳридаги Co-op Live Arena’да ўтказади.
Queensberry промоутерлик компанияси томонидан ташкил этилаётган бокс оқшомида Жалоловга хорватиялик Агрон Смакичи рақиблик қилади. Ушбу боксчилар 2024 йилдаёқ тўқнашиши керак эди, бироқ ўшанда Жалоловнинг ўрнини эгаллаган Жаҳонгир Зокиров Смакичини мағлуб этишга муваффақ бўлган.
Маълумот ўрнида, “Big Uzbek” шу кунгача ўтказилган 17 та жангининг барчасида ғалаба қозонган (15 нокаут). У сўнгги бор 2025 йил ноябрида Соломон Адебаёни муддатидан олдин мағлуб этган эди. Унинг рақиби Агрон Смакичи ҳисобида эса 21 ғалаба ва 3 мағлубият мавжуд.
Эслатиб ўтамиз, Манчестердаги турнирнинг марказий жангида супероғир вазн юлдузлари Даниэль Дюбуа ва Фабио Уордли ўзаро тўқнаш келади. Жалолов иштирокидаги беллашув муҳимлиги бўйича асосий карднинг 4-жангчи бўлади.
