Ўзбекистон ёшлар терма жамоаси ниҳоят ғалаба қозонди ҳамда 3 очко билан гуруҳда 2-ўринни эгаллаб, жаҳон чемпионатининг нимчорак финал босқичига чиқди!
Жамоамиз кейинги босқичга чиқиши учун Фижини мағлубиятга учратиши (камида 2та тўп фарқи билан) ҳамда Германия Гондурасга очко бермаслиги керак эди. Барчаси биз кутгандек бўлиб чиқди. Немислар Гондурасни 5:1 ҳисобида мағлуб этишди. Ўзбекистон фижиликлар дарвозасига дастлабки голни киритиши учун 1 соатдан ошиқроқ вақт керак бўлди.
Бутун ўйин давомида устунлик Ўзбекистон ёшлари томонида бўлди. Фижи қарши ҳужумга таяниб ўйнади. Биринчи бўлимда ташкил этилган ҳужумларнинг бирида Шомуродов ва Ўринбоевнинг зарбалари тўсинга тегиб қайтди.
Иккинчи бўлимда вакилларимиз босимни янада оширишди ва Фижи посбони хато қилишга мажбур бўлди. У Шомуродовнинг бош билан йўллаган унча кучли бўлмаган зарбасини ўтказиб юборди. Орадан 3 дақиқа ўтиб, вакилларимиз қарши ҳужумда рақибни яна бир марта жазолашди. Найрубе бу сафар Ўринбоевнинг зарбасини қайтара олмади.
Жамоамиз иккита тўп фарқи билан олдинга ўтиб олганига қарамай тўп назорат қилишди ва ҳужум қилишда давом этди. Ўйин қўшиб берилган дақиқаларнинг сўнгисида Миржамол Қосимов жарима майдончаси ичида аниқ зарба йўллаб, якуний ҳисобни ўрнатди — Фижи - Ўзбекистон - 0:3!
Шу тариқа, Ўзбекистон ёшлар терма жамоаси "F" гуруҳида 2-ўринни эгаллади ва нимчорак финалга чиқди. Жамоамиз 11 июнь куни Австрияга қарши баҳс олиб боради. Бу жамоа "В" гуруҳида 5 очко билан 2-ўринни эгаллади.
Ёшлар ўртасида Жаҳон чемпионати, "F" гуруҳи, 3-тур
ФИЖИ - ЎЗБЕКИСТОН - 0:3 (ОНЛАЙН ТРАНСЛЯЦИЯ)
Голлар: Элдор Шомуродов (61), Забиҳилло Ўринбоев (64), Миржамол Ўринбоев (90+3)
Фижи: 1.Мисивани Найрубе, 2.Пранил Найду, 3.Гариш Прасад, 4.Жейл Дрелоа (С), 5.Атонио Туивуна, 7.Никел Чанд, 8.Сетареки Хюгес, 9.Йосефо Вереноу, 12.Рату Варанайвалу, 15.Саула Вака, 17.Колинио Сивоки
Ўзбекистон: 12.Дилшод Ҳамроев, 2.Рустамжон Ашурматов, 3.Иброҳим Отахонов, 5.Одилжон Ҳамробеков, 6.Акромжон Комилов, 8.Жавоҳир Соҳибов, 9.Элдор Шомуродов, 10.Отабек Шукуров, 17.Достонбек Ҳамдамов, 19.Забиҳилло Ўринбоев, 20.Достонбек Турсунов
