Шу кунларда юртимизда Япониянинг "Асаҳи Шимбун" газетаси мухбирлари меҳмон бўлиб туришибди.

Улар ўзбек футболи ва спорти, мамлакатимиз бошқа соҳаларда қўлга киритаётган ютуқлар билан ўқувчиларини таништиришга ҳаракат қилишади. Кеча "Бунёдкор" - "Насаф" учрашувини стадионда кузатган Хитоки Накагава ва Татьяна Крапивина бугун тушда "Пахтакор" стадионига ташриф буюриб, стадионда яратилган шароитлар, унинг тарихи ҳақида маълумот олишди. Кейин эса "Пахтакор" футбол клуби, тарихи, эришилган ғалабалар, жамоанинг ҳозирги пайтдаги ҳолати билан яқиндан танишишди. "Пахтакор" вице-президенти Самвел Бабаян меҳмон журналистларнинг турли масалалар бўйича берган саволларига жавоб қайтарди.

"Асаҳи Шимбун" газетаси мухбирлари юртимизда яна бир неча кун бўлиб, спорт ва саноатда эришилаётган ютуқлар ҳақида маълумот олишади.