Миржалол Қосимов устозлигидаги Ўзбекистон миллий терма жамоаси Тошкентдаги йиғинини давом эттирмоқда.
Бугун терма жамоамиз иккинчи кунги машғулотларни ўтказди. Машғулот якунлангач “Машъал” сафидан бош жамоамизга жалб этилган тажрибали ҳужумчи Зоҳир Қўзибоев сайтимизга қисқача интервью берди.
- Кеча йиғинни бошладик. Бугун иккинчи кунги машғулотлар давом этди. Барчанинг кайфияти аъло даражада. Бугундан легионерларимиз ҳам машғулотларга киришишди. Мураббийларимиз бизни олдинда турган муҳим ўйинларга тайёрлашмоқда. Биз ҳам қўлдан келганча уларнинг кўрсатмаларини тўғри бажаришга ҳаракат қиляпмиз. Энг асосий мақсад – маъсулиятли учрашувларга яхши ҳозирлик кўриш.
Жаҳон чемпионатига саралаш баҳслари бошланмоқда. Саралаш босқичи янгича форматда ўтказилади. Менимча, бежизга бу босқич янгича форматга ўтказилмади. Унинг ҳам ўзига яраша ижобий томонлари бўлиши керак. Насиб этса манашу форматда ўтадиган баҳсларда муваффақият қозониб, Жаҳон чемпионатининг финал раундига йўл олсак не ажаб…
Таркибга яхши футболчилар жалб этилган. Бу гапни ҳужумчилар борасида ҳам айта оламан. Рақобатнинг бор экани терма жамоамиз учун жуда ҳам фойдали. Мен рақобатдан қўрқмайман. Зеро, айнан рақобат туфайли футболчи ўз устида кўпроқ ишлайди ва янада ўсишга эришади. Майдонга кимнинг бошланғич таркибда тушишини эса бош мураббий ҳал этади. Мен имкон берилса ўзимни кўрсатишга ва терма жамоамизга ўз голларим билан фойда келтиришга доим тайёрман, - дейди тажрибали ҳужумчи SPORTS.uz порталига.
