Ўз олдига юқори мақсадларни қўйиб тобора профессионаллик сари интилаётган “Локомотив” Англия биринчи дивизиони вакили “Флитвуд Таун” билан ўзаро ҳамкорликни йўлга қўймоқда.

Клуб имижини янада шакллантириш борасида иш олиб бораётган жамоамиз энди “Флитвуд Таун” билан бир қатор соҳаларда ҳамкорлик қилади. Эсингизда бўлса, апрель ойи сўнггида халқаро майдонда ҳамкорлар топиш ва ёш иқтидорларимизни жаҳон футболи ҳавосидан бахраманд этишга бел боғлаган “темирйўлчилар” делегацияси бир неча кун давомида инглиз диёрида бўлиб қайтишганди. Мана энди навбат “Флитвуд Таун” жамоасига. Ушбу клуб вакиллари шу кунларда юртимизга ташриф буюришади ва “Локомотив” билан “Флитвуд” ўртасидаги ҳамкорликни расман тасдиқлайдиган шартнома имзоланади.

Мазкур келишувга биноан энди ҳар икки жамоа фикр алмашинув, тижорат ҳамда футболчилар тажриба орттириши масалаларида яқиндан алоқаларни йўлга қўйишади.

Ушбу ҳамкорликнинг йўлга қўйилганини омма эътиборига расман таништриш эса 29 июнь куни бўлиб ўтадиган матбуот анжуманида амалга оширилади. Матбуот анжумани соат 12:00 да “Локомотив” стадиони матбуот анжуманлари залида бўлиб ўтади. Унга барча оммавий ахборот воситалари вакилларини таклиф этамиз!