Хабар берганимиздек, 26-28 июнь кунларига мўлжалланган Австралия Очиқ чемпионатида таэквондо ВТФ бўйича Ўзбекистон терма жамоасининг уч нафар аъзоси 2та медалга сазовор бўлган эди. Мельбурн даянларида жаҳон чемпиони Шмитрий Шокин барча рақибларини мағлуб этиб, олтин медалга сазовор бўлди. Жаҳон вице-чемпиони Жасур Бойқўзиев эса финалга қадар етиб бориб, кумуш медал билан тақдирланди. Мусобақа таассуротлари билан ўртоқлашар экан, Боқўзиев сайтимизга шундай интервью берди:

“Мельбурндаги мусобақада учта баҳс ўтказдим. Биринчи жангимда қозоғистонлик спортчини 5:2 ҳисобида мағлуб этдим. Ярим финалда Янги Зеландия вакилига рўбарў келдим. Бу рақибимдан 6:1 ҳисобида устун келдим. Ҳал қилувчи финал беллашувида кореялик спортчига қарши даянга чиқдим.

Ли Сёнг-Хван Жанубий Корея чемпиони экан. Жанг анча муросасиз кечди. Асосий вақтда 4:4 ҳисоби қайд этилди. Қўшимча бўлимда бир очко фарқи билан рақибимга имкониятни бой бериб қўйдим. Энди бор эътиборимни Гран-при туркумидаги мусобақаларга қаратаман.

Боиси, айнан мана шу турнирлар Рио-2016 Олимпиадасига тўғридан-тўғри чиқишимни таъминлайди. Биринчи Гран-при август ойида Москвада бўлиб ўтади. Кейин навбати билан Туркия, Манчестер ва декабрь ойидаохирги финал Гран-приси Мексиканинг Мехико шаҳрида ўтказилади”.

Эслатиб ўтамиз, Шокин ва Бойқўзиевдан ташқари, Австралия Очиқ чемпионатида Умида Абдуллаев ҳам иштирок этди. Афсуски, Нанкин ўсмирлар Олимпиадаси кумуш медал совриндори илк учрашувдаёқ имкониятни бой бериб қўйди. Терма жамоамиз делегацияси 30 июнь куни Тошкентга қайтиб келади.