Ўзбекистон терма жамоаси бош мураббийи — Самвел Бабаян спорт журналистикаси соҳасида фаолият олиб бораётган оммавий ахборот воситалари вакиллари билан норасмий учрашув ташкил этди.

Ушбу йиғилишни уюштириш ғояси миллий терма жамоаниг янги бош мураббийидан чиққан бўлиб, ундан кўзланган мақсад юртимизда футболни ёритаётган барча нашрлар вакиллари билан танишиб олиш, уларнинг ғоя, таклиф ва танқидларини тинглаш, биргалашиб уларни бартараф этиш ва энг муҳими миллий терма жамоа атрофида барча, шу қаторда журналистларни ҳам бирлаштириш, бир мақсад йўлида ҳамжиҳатликда иш олиб боришдан иборат эди.

Давра суҳбати шаклида ўтган бу йиғилишда мутлақо очиқ мулоқот бўлиб ўтди. Бош мураббий журналистларнинг барча саволларига жавоб берди. Уларни қизиқтирган барча муаммоларга ойдинлик киритди. Журналистлар терма жамоа билан ишлашда шу вақтгача юзага келган қийинчиликлар ҳақида бош муарббийга гапириб, уларга яна дуч келмаслик учун амалий ёрдам беришини сўрашди ва терма жамоалар маркази фаолиятини янада такомиллаштириш бўйича ўз таклиф ва мулоҳазаларини билдирдилар.