Исфахоннинг “Сепахон” жамоаси сафида сўнги ярим мавсумни ажойиб тарзда ўтказган ва Эрон чемпионлигига сазовор бўлган Ўзбекистон миллий термаси аъзоси Фозил Мусаевга Саудия Арабистонининг топ-клубларидан бири қизиқиш билдириб, шу кунларда форслар раҳбариятига мурожаат қилди.

Бироқ 2016 йили Осиё Чемпионлар лигасида тўп сурадиган ушбу араб клуби “Сепахон”дан рад жавобини олди.

- Мусаев жамоамизнинг етакчиларидан саналади. У чемпионлик унвонини қўлга киритишимизда асосий роллардан бирини ўйнади. Ўзбекистонлик футболчини мухлисларимиз ҳам жуда қаттиқ ҳурмат қилишади. Ҳа, яқинда унинг трансфери бўйича бизга Саудия Арабистони грандларидан бири алоқага чиқди. Араблар 1 миллион доллар миқдорида трансфер суммасини тўлашга тайёр эканликларини айтишди. Аммо ярим ҳимоячимиздан келаси мавсумдаги Чемпионлар лигасида ўзимизнинг ҳам умидларимиз катта, - деди “Сепахон” менежери Расул Хорваш.

- Фозилнинг нархи кескин равишда ошгани – бу табиий ҳол. Араблар бизнинг ички чемпионатимиз ва унда ўйнаётган футболчиларимиз ҳақида у қадар чуқур ва тўлиқ маълумотга эга эмаслар. Улар футболчиларимизни Чемпионлар лигаси ва терма жамоамиз учрашувлари орқали бир йилда кўпи билан 2-3та беллашувда бевосита кўришлари мумкин. 

Эрон чемпионати уларга яқинроқ ҳисобланади ва ўзбекистонлик футболчилар учун ўзига хос кўприкдир. Шу сабабли араблар Фозилни сўнги давр мобайнида мунтазам кузатиб боришган. Мусаевнинг “Сепахон” билан яна бир йиллик шартномаси бор. Балки бу каби таклифларни кейинги ёзда кўриб чиқармиз. Ҳозирча у фаолиятини Эронда давом эттиради, - дейди футболчининг агенти Санъат Шарипов.