Жанубий Кореянинг Кванджу шаҳрида давом этаётган Бутунжаҳон талабалар Универсиада ўйинларининг Таэквондо (WTF) бўйича ўтказилаётган мусобақаларида ҳамюртимиз Дмитрий Шокин яна бироздан сўнг олтин медаль учун доянга чиқади.
Оғирлик вазни 87 кг.дан юқори бўлган спортчилар мусобақасида Ватанимиз шарафини ҳимоя қилаётган Дмитрий ҳозигина якунига етган ярим финал жангида эронлик Меҳран Аскарини 9:7 ҳисобида мағлуб этди.
Таъкидлаш жоизки, ушбу учрашувда ҳам Дмитрий ғалабага бўлган иродасини намоён қилди. Биринчи раунддан сўнг 2:3 ҳисобида ортда бораётган ҳамюртимиз навбатдаги раундларда нафақат вазиятни тенглаштиришга, балки якуний натижани ўз фойдасига ҳал қилишга эришди.
Шундай қилиб, ниҳоят делегациямиз ҳисоби Универсиада-2015 ўйинларининг дастлабки медали билан бойидиган бўлди. Ушбу медаль олтин бўладими ёҳуд кумуш бироздан сўнг ўтказиладиган финал учрашувидан сўнг билиб оламиз.
Финал жанги Тошкент вақти билан соат 14:24га белгиланган. Дмитрий Шокин Универсиада-2015 ўйинларининг олтин медали учун кечадиган беллашувда айни дақиқаларда иккинчи ярим финал жангида баҳс юритаётган Майкон Де Андраде (Бразилия) - Ён Кун Парк (Ж.Корея) ғолибига қарши баҳс юритади.
