Жорий йилнинг 17-19 июль кунлари пойтахтимиздаги олимпия захиралари Республика теннис мактаби кортларида теннис бўйича Дэвис кубогининг Осиё-Океаний минтақаси биринчи гуруҳ иккинчи босқич учрашуви ўтказилади ва унда Ўзбекистон терма жамоаси Жанубий Корея вакиллари билан жаҳон лигасининг ўтиш турнири йўлланмаси учун куч синашади.    Бу йилги мавсумнинг дастлабки босқичида қуръага кўра Ўзбекистон терма жамоаси ўтказиб юборган бўлса, Жанубий Корея вакиллари биринчи босқичда Таиланд термасидан 3:2 ҳисобида устун келдилар.    Ўзбекистон терма жамоаси сардори Петр Лебедь ушбу учрашувга Денис Истомин, Фаррух Дўстов, Темур Исмоилов ва Санжар Файзиевларни таклиф этган. Мазкур учрашувга тайёрлик жараёнида ташкил этилган ўқув-машғулот йиғинларига терма жамоамиз таркибида, шунингдек, ўсмирлар ўртасида Австралия очиқ чемпионати ярим финалчиси Жўрабек Каримов ва икки карра Ўзбекистон чемпиони Ҳумоюн Султонов ҳам жалб этилган.    Дэвис кубоги мусобақаларида Ўзбекистон ва Жанубий Корея терма жамоалари ўзаро беш бор баҳс юритишган бўлиб, шундан тўрттасида Ўзбекистон терма жамоаси аъзоларининг қўллари баланд келган.    Бу икки терма жамоа Дэвис кубоги мусобақаларида сўнгги бор 2010 йили тўқнаш келишган. Жанубий Корея кортларида бўлиб ўтган ўша ўйинда Ўзбекистон терма жамоаси 3:2 ҳисобида зафар қучган.    Шу ўринда таъкидлаш жоизки, ўтган беш йилда Жанубий Корея терма жамоаси анча ёшартирилди. Жумладан, биринчи рақамли теннисчи Хён Чунг май ойида 19 ёшни қаршилади. Айни пайтда дунё рейтинг жадвалида 79-ўринда бормоқда. Кореяликларнинг иккинчи рақамли теннисчиси Дак Хи Ли эса – 17 ёш. Бундан ташқари терма жамоа таркибидан Жи Сунг Нам (22 ёш) ва Мин Кю Сонг (25 ёш) ўрин эгаллашган. Захирадан эса Сеонг Чан Хонг (18 ёш) ҳамда Ёхсонг Чунг (17 ёш) жой олишган.    Учрашувга 16 июль куни қуръа ташланади.   Шавкат Жалилов