Ёзги танаффусда футбол олами бироз уйқуга кетади. Ахборотга талабчан мухлисларни бу давр бироз зериктириб қўяди. Шу бўшлиқни тўлдириш мақсадида сайтимиз ходимлари футбол оламида рўй берган қизиқарли воқеалар билан таништиришни мақсад қилиб қўйишди.
Британия оролларида туман тушиши одатий ҳолат. Шундай туманли кунларнинг бирида икки шотланд жамоаси баҳс ўтказишади. Туман шу даражада қуюқлашадики, жамоалар тўпни йўқотиб қўйишади. Ҳар икки жамоа футболчилари тўпни излашга тушган вақтда ҳакам майдондаги футболчилар сони кўплигини пайқаб қолади. Санаш ноқулай бўлганлиги учун заҳира ўриндиғи томон югуради. Кутганидек заҳира ўриндиғида ҳеч ким бўлмайди. Ҳакам учрашувни бекор қилади. Маълум бўлишича майдонда ўттиз нафар футболчи тўп сурган.
***
Дания терма жамоаси сардори Сёрен Лербю 1985 йил 13 ноябрда ҳақиқий футбол жонкуяри эканлигини намойиш этади. Гап шундаки, кун ярмида жаҳон чемпионати саралаши доирасида у Ирландия терма жамоасига қарши тўп суради. Ўйин якунлангач мураббий рухсати билан Германияга учади. Сёрен ўша куни тунда бўлиб ўтган “Бохум”га қарши Германия кубоги баҳсида “Бавария” таркибида ҳам ҳаракат қилади.
***
Бразилиядаги учрашув вақтида шамол парашютчи гуруҳни футбол майдони томон элтади. Парашютчилардан бири дарвозабон устига келиб йиқилади. Шу вақтда рақиб жамоа гол уради. Голни ҳисоблаган ҳакам учрашув қайдномасида парашютчининг йиқилишини “Олий куч томонидан халақит” деб белгилаб қўяди.
Олим ТОЛИПОВ
