Тошкентнинг “Бунёдкор” жамоаси таркибида иккинчи давра бошланиши олдидан ўзгариш юз берди.

“Қалдирғочлар” сафини тажрибали ҳужумчи Анвар Бердиев тарк этди. Клуб ва футболчи ўртасида тузилган шартнома ўзаро келишувга кўра бекор қилинди.

- “Бунёдкор”дек жамоа сафида тўп тепганимдан жуда мамнунман. Шунча йил футбол ўйнаб, билмаган нарсаларимни “Бунёдкор”да ўргандим. Янги дўстлар орттирдим. Клубда олиб борилаётган ишларга фақат ва фақат ҳавас қилса арзийди. “Бунёдкор”ни тарк этаётган бўлсам-да, жамоа билан илиқ муносабатларимиз доимо сақланиб қолинади. Чунки бу ерда мен учун қадрдон бўлган инсонлар бор. “Қалдирғочлар”га янгидан-янги муваффақиятлар тилайман, - дейди Анвар Бердиев.

“Бунёдкор” футбол клуби ҳам ўз навбатида олиб борилган ҳамкорлик учун Анвар Бердиевга ўз миннатдорчилигини билдиради.