Греция терма жамоаси бош мураббийи Серхио Маркарян ишдан бўшаш ҳақида ариза ёзди.
70 ёшли ушбу уругвайлик мутахассис 2015 йилнинг 12 февралида Греция терма жамоаси бош мураббийи сифатида тайинланганди.
Унинг раҳбарлигида 5 ой давомида греклар Евро-2016 саралаши доирасида 2та ўйин ўтказишди. Венгрия билан ўйинда 0:0 ҳисобида дуранг натижа қайд этилган бўлса, Фарер ороллари терма жамоасига 1:2 ҳисобида мағлуб бўлинди. Саралаш босқичида F гуруҳидан жой олган Греция айни вақтда 6 турдан сўнг 2 очко билан энг сўнгги ўринни эгаллаган.
"Мен Греция терма жамоасини жуда қийин даврда бошқардим. Менга бундай масъулиятли вазифа ишониб топширилгани учун ўз миннатдорчилигимни билдираман. Мен илк кунданоқ чин дилдан меҳнат қилдим, футболчилар ҳам барча айтганларимни бажаришга ҳаракат қилишди.
Мухлислардан узр сўрайман. Улар билдирган ишончни оқлай олмадик, кўрсатган натижаларимиз жуда ёмон бўлди", деб баёнот берди Маркарян.
Қайд этиш жоизки, Греция футбол федерацияси ҳали унинг истеъфосини қабул қилмади.