Бир ҳафта мобайнида Тошкент вилоятининг Чорвоқ сув омбори ҳудудида жойлашган Ўзбекистон металлургия комбинати дам олиш масканида жисмоний тайёргарликларини тиклашга муваффақ бўлган “Металлург” жамоаси аъзолари Рамазон ҳайити байрами муносабати билан кичик таътилга чиқишганди.
Душанба кунидан эътиборан бекободлик футболчилар энди Чирчиқ шаҳрида жамланишди ва “Кимёгар” стадионида икки маҳалдан машғулот олиб боришмоқда. Машғулотларда асосий эътиборн футболчиларнинг тўп билан ишлаш жараёнига қаратилмоқда. Давралар оралиғида жамоамиз таркибида ўзгаришлар йўқ.
“Локомотив” жамоаси билан ўтказилган Ўзбекистон кубогининг жавоб учрашувида бош мураббийимиз Рустам Мирсодиқов эътироф этганидек, клуб таркибини фақатгина чемпионатлар оралиғида бироз ўзгартириши мумкин. Шу боисдан ҳам жамоани тарк этганлар, таркибга янги келиб қўшилган футболчилар йўқ. Тўғри, агарда “Металлург”да фаолиятини давом эттириш истагида бўлган ўйинчилар бор бўлса, уларнинг кўкрагидан итарилмайди. Шундай хоҳиш билан давралар оралиғида Фаррух Нурлибоев жамоа раҳбарларига мурожаат этганди. У айни пайтда машғулотларда қатнашаяпти. Жамоада қолиш қолмаслиги эса назорат ўйинларидан кейин аниқ бўлади. Шу ўринда баъзи сайтларда Суннатилла Мамадалиевнинг жамоага келиб қўшилганлиги, Шаҳзодбек Нурматовнинг “Насаф”га ўтаётганлиги ҳақидаги маълумотлар эса ҳозирча асоссиз.
Командамизнинг икки ўйинчиси – ҳимоячи Жавлон Мирабдуллаев ҳамда ҳужумчи Шоҳназар Норбековлар Ўзбекистон олимпия терма жамоасининг йиғинида қатнашишди. Норбековга биринчи йиғиндан кейин жавоб берилган бўлса, олимпиячиларни ўйинларда сардор сифатида майдонга бошлаб тушган Мирабдуллаев Виктор Романович ихтиёрида иккинчи йиғинга ҳам олиб қолинди. Шунингдек, яна бир ўйинчимиз – Шаҳзодбек Нурматов Ўзбекистон миллий терма жамоаси мураббийлари эътиборида турибди. Самвел Вячеславович унинг айни пайтдаги ҳолати, биринчи давранинг охирги турларини қандай ўтказганлиги билан қизиқди.
Назорат учрашувлар бўйича мухлисларимизга маълумот. “Металлург” иккинчи даврага қадар иккита ўртоқлик учрашувини ўтказишни режалаштираяпти. 25 июль куни ҳамшаҳарларимиз “Бунёдкор” жамоасининг асосий таркиби билан, 29 июль куни эса ёшлар таркиби билан кўрик ўйинларида майдонга чиқишади
