Бугун мамлакатимизнинг биринчи рақамли теннисчиси Денис Истомин Швециянинг Баштад шаҳрида давом этаётган турнирнинг яккаликдаги иккинчи давра учрашувини ўтказади.
Ҳамюртимиз мукофот жамғармаси 439.405 еврони ташкил этувчи мусобақанинг чорак финалига чиқиш учун Николас Альмагрони енгишига тўғри келади. Таққослаш учун, Истомин дунё рейтингида 73, Альмагро 145-ўринни эгаллаб турибди. Лекин испан теннисчиси ўз вақтида 9-ўрингача кўтарилган.
Эслатиб ўтамиз, ҳамюртимиз Баштад турнирининг илк даврасида аргентиналик Диего Шварцманни 6:3, 6:4 ҳисобида мағлуб этди. Николас Альмагро эса ҳамюрти Фернандо Вердаскодан 6:4, 1:6, 7:5 ҳисобида устун келди.
