“Нефтчи” янги футбочиларини оммага таништирув маросими жуда ҳам қизиқарли ўтди. Тадбирга йиғилган мухлислар жамоа мураббийи Мурод Исмоилов, футболчилар Мансур Саидов, Жаҳонгир Меҳмоновлар билан мулоқот қилиш имконига эга бўлишди.

Суҳбат чоғида ишқибозлар “Шўртан”дан учралган мағлубиятдан қаттиқ ранжишган эканлигини маълум қилишди ва “Локомотив” билан бўлажак баҳсда фақатгина ғалаба уларни қониқтиришини қўшимча қилишди. Клуб вакиллари ва ишқибозлар ўртасидаги суҳбат самимий ўтди. Бизни суҳбат чоғидаги мавзулардан бири жуда ҳам диққатимизни тортди. Биринчи даврада “Локомотив” “Нефтчи” билан Тошкентда дуранг ўйнаганди. Баҳсдан сўнг соғлиғи билан муаммо тафайли ўйинда бўлмаган Вадим Абрамов “Футбол Экспресс” газетаси мухбирига қуйидагича фикрларни айтиб ўтганди:

“Фарғоналиклар билан ўйинда омадимиз келмади. “Локомотив” “Нефтчи”га ўхшаган жамоаларни ҳар қандай вазиятда, ҳатто ёмон ўйнаганда ҳам мағлуб этиши керак”. Бу Абрамовнинг фикрлари.

Мазкур интервьюни “Нефтчи” мухлислари Мурод Исмоилов ва Мансур Саидовга эслатишди ҳамда “Нефтчи” ҳурматига нисбатан мазкур салбий фикрларга шанба оқшомида ғалаба билан жавоб бериш керак эканлигини айтиб ўтишди.

Мухлислардан яна бири Мансур Саидовга қуйидагича фикрларини маълум қилди. “Мансур, мен “Нефтчи”ни жуда ҳам яхши кўраман. Агар жамоа мағлуб бўлса, йиғлаб юборгим келади. Илтимос, хар қандай вазият, ҳатто ҳисобда ортда бораётган бўлсангиз ҳам биз мухлислар учун охиргача кураш олиб боринглар. Керак бўлса, жамоани ортидан АҚШга ҳам мухлислик қилгани ҳам боравераман ” – деди “Нефтчи”нинг ашаддий мухлиларидан бири.

Ҳа, мухлислар натижа бўлмаганда тақдирда ҳам чиройли ўйин тарафдори. Тадбирда мухлислар Мурод Исмоилов ва унинг шогирдларига ишонишлари айтиб, уларни қўллаб-қувватлашди.

Дарҳақиқат, “Нефтчи”ни “Локомотив”га қарши жиддий ўйин кутмоқда. Ҳозирча таркибдаги асосий йўқотиш Жаҳонгир Меҳмонов бўлиб турибди. Лекин футболчини ўша куни майдонга тушиши эҳтимоли ҳам бор.
“Рухсор” радиоси, “Футбол кундалиги” дастуридан.