Матбуот анжуманининг иккинчи қисмида “Насаф” устози Рўзиқул БЕРДИЕВ ОАВ ходимлари саволларига жавоб қайтарди.

-Бугун ишончли ғалабага эришдик. Майдонда рақибдан ҳар жиҳатдан устунлик қилдик. Бугун “Олмалиқ”дан анча кучли ўйин кутгандик. Лекин амалда улар ўз кучларини намойиш эта олишмади. Бунинг учун йигитларга раҳмат. Таркибда ўзгаришлар? Бу борада ишлаяпмиз. Яширишни ҳожати йўқ. Биринчи даврада “Локомотив”да тўп тепган Дамир Кояшевичга таклиф билан чиққандик. Лекин у қўйган талабларни биз бажара олмаймиз. Легионерни таркибга жалб қилиш учун катта маблағ керак бўлади. Азамат Алланиязов бугун ўзига билдирилган ишончни оқлади. Ўйинда биринчи голни урди. Футболни соғиниб қолгани кўриниб турибди. Лекин жисмоний жиҳатдан ҳали ўз формасига кириб олгани йўқ. Имконият беришда давом этамиз. Ўйлайманки, у ҳали мавсум давомида ўзини кўрсата олади. Кенжа Тўраев кеча тиббий кўрикдан муваффақиятли ўтди. Бугун у ўйин қайдномасидан ўрин олганди. Лекин ҳали у ўйинга тўлиқ тайёр эмас. Ҳужумчиларимиз ўз формасини тиклаб олишса, мухлисларга кўплаб голларни тақдим этишади.

-Жамоада молиявий муаммолар ҳақида гап-сўзларни эшитаяпмиз...

-Тўғрисини айтиш керак, буни инкор этмайман. Футболчилар олдида қарздорлик мавжуд. Лекин, ўйлашимча, бу жамоамизнинг ўйинига таъсир қилмайди. Ишонаманки, ҳомийларимиз жамоани ўз ҳолига ташлаб қўймайди. Улар клубнинг ҳолатидан хабардор. Бу муаммолар албатта ижобий ечимини топади. Чунки “Насаф” Ўзбекистонда ўз ўрнига, мавқеига эга жамоа.