Иккинчи давра олдидан таркибини бир қатор янги футболчилар билан тўлдирган «Динамо» жамоаси «заявка» муддатининг сўнгги кунида яна бир ҳужумчини ўз сафига қўшиб олди.

Хабарингиз бор, иккинчи давра олдидан жамоамиз ҳужум чизиғидаги рақобатни кучайтириш учун ҳужумчи излаётган эди. Куни кеча «Динамо» биринчи даврани «Олмалиқ» сафида ўтказган 28 ёшли ҳужумчи Камолиддин Мурзоев билан келишувга эришди. Иккинчи давра учун янги футболчиларни рўйхатдан ўтказишнинг сўнгги муддати саналмиш 14 август куни «Динамо» Камолиддин Мурзоевни ПФЛ «заявка»сидан ўтказди.

Ҳужумчи айни дамда клубимиз ихтиёрига келиб қўшилган ва машғулотларда иштирок этмоқда. Камолиддин Мурзоев «Динамо» жамоаси сафида 97-рақам остида тўп сурадиган бўлди.

Маълумот ўрнида, 28 ёшли ушбу ҳужумчи 2010-2013 йиллар давомида «Насаф» ва «Бунёдкор» клублари сафида тўп сурган бўлса, сўнгги мавсумни Қозоғистоннинг етакчи клублари «Иртиш» ва «Шахтёр» сафида ўтказганди. Жорий мавсумнинг биринчи қисмини эса «Олмалиқ» таркибида ўтказиб, 12 ўйинда 3 маротаба рақиблар дарвозасини ишғол этганди.