Қозоғистон премьер лигасининг биринчи давраси якунланиб жамоалар иккига бўлинишди. Юқори 6 ўринни эгаллаган клублар чемпионлик учун кураш олиб боришса, қолган 6 жамоа премьер лигада жон сақлаш учун ҳаракат қилишади. “Ўрдабаси” клуби жорий мавсумда Еврокубокга йўлланма бериш учун ҳаракатни бошлаган. Виктор Кумиков шогирдлари 23 – турда биринчи ўринда келаётган “Қайрат”ни ўз майдонида қабул қилди. Олма Ота клуби Европа лигасида жуда яхши ўйин кўрсатиб келаётгани барчага айён. Шунинг учун ҳам учрашув мезбонлар учун жуда қийн кечиши кутилганди. Мазкур баҳсни ватандошимиз Александр Гейнрих дисквалификация туфайли ўтказишга тўғри келди.
Имкониятдан фойдаланиб Саша билан қисқача сухбатлашдик.
- Саша, уч учрашувга четлатишганини тўғри баҳолайсанми?
Ўша пайтда мени рақибим ушлаганди. Оёғимни тортиб оламан деган пайтимда қўполлик ишлатдим. 3 баҳсга четлатиши қайсидир маънода тўғри. Бундан хулоса чиқариб кейинги учрашувларга тайёргарлик кўраман.
- Бугун рақиб “Қайрат”. Қандай натижа қаид этилади деб ўйлайсан?
“Қайрат” клубининг футболчилари кучли бўлгани учун уларнинг намойиш этаётган ўйинлари ҳам яхши чиқмоқда. Аммо, бугун бизнинг жамоанинг ғалаба қозонишига умид қиламан.
- Яқинда терма жамоа мураббийи Равшан Ҳайдаров сизнинг ўйинингизни томоша қилиш учун келганди. Сизни терма жамоага таклиф қилишдими?
Ҳа, мураббий билан кўришиб гаплашдик. Узоқ танаффусдан сўнг терма жамоага яна қайтиш ёқимли. 21 август куни Тошкентда йиғинларга таклиф қилишган. Олдаги ўйинга ҳозирлик кўрамиз. Ўзимнинг бор иқтидоримни кўрсатишга ҳаракат қиламан. Терма жамоа бу терма жамоа.
- “Ўрдабаси” яна Еврокубокка йўлланма берувчи ўринни эгаллай оладими?
Биринчи мақсадимиз юқори 6 клубнинг орасидан ўрин олиш эди. Бу вазифа уддаланди. Энди европа лигаси учун ҳаракат қиламиз. Бунинг учун бизнинг кучимиз етади. Ҳаракат қиламиз ва мухлисларнинг ишончини оқлаймиз деган умиддаман.
“Ўрдабаси” ва “Қайрат” клубларининг ўйинида ҳисоб очилмади.
Тўлқин Бакирхўжаев суҳбатлашди.
