Ўзбекистоннинг биринчи рақамли ракетка устаси Денис Истомин (дунё рейтингида 70-ўринда) Нью-Йорк шаҳри (АҚШ)да бошланган теннис оламининг энг йирик мусобақаларидан бири АҚШ очиқ чемпионатининг яккалик баҳсларини ғалаба билан бошлади. 

Биринчи даврада германиялик Бенжамин Беккер (дунё рейтингида 73-ўринда) билан баҳс юритган ҳамюртимиз 2 соату- 30 дақиқа давом этган учрашувда 6-7, 6-4, 6-4, 6-1 ҳисобида зафар қучди ва иккинчи даврага йўл олди (Денис Истомин ва Бенжамин Беккер ўртасидаги ўзаро учрашувда ҳамюртимиз 5:1 ҳисобида олдинда бормоқда). 

Ушбу босқичда Денис Истомин турнирда 20-рақам остида сараланган Доминик Тим (Австрия)га қарши кортга тушади. Австриялик теннисчи биринчи даврада Даниэль Химено-Травер (Испания)ни 7-5, 6-3, 7-5 ҳисобида мағлубиятга учратди. 

Денис Истомин мазкур нуфузли мусобақанинг жуфтликлар мусобақасида ҳам бош соврин учун кураш олиб боради. Беларуслик шериги Александр Бурий билан баҳсларга киришадиган юртдошимиз дастлабки даврада Раду Албот (Молдова) / Янко Типсаревич (Сербия) дуэти билан баҳс юритади. 

Маълумот учун. “Катта дубулға” туркумига кирувчи дунёдаги тўртта энг йирик теннис турниридан бири ҳисобланган АҚШ очиқ чемпионати бу йил 135-бор ўтказилмоқда. Мукофот жамғармаси 19.852.700 долларни ташкил этган мазкур мусобақалар Нью-Йорк шаҳридаги Миллий теннис маркази кортларида ўтказилмоқда, дейилади Миллий Олимпия қўмитаси расмий сайтидаги хабарда.