Хабарингиз бор, йигирма биринчи тур доирасида “Қизилқум” жамоаси сафарда “Андижон” футболчилари билан куч синашади.
Режага кўра, навоийликлар 10 сентябрь оқшомида Тошкент — Фарғона ҳаво йўналиши бўйича водийга етиб келишди. Клуб бош менежери Ҳамиджон Актамов раҳбарлигида Фарғона шаҳрига ташриф буюрган “Қизилқум” жамоаси аъзолари кўркам “Asia palas” меҳмонхонасига жойлашди.
Маълумот ўрнида таъкидлаш керакки, биринчи даврада Навоийда бўлиб ўтган “Қизилқум” — “Андижон” жамоалари учрашувида мезбонлар 1:0 ҳисобида ғалаба қозонган. Украиналик ярим ҳимоячи Андрей Деркач киритган ягона гол навоийликларга муҳим уч очкони тақдим этган эди.
Эслатиб ўтамиз, ёшлар лигаси доирасидаги учрашув 11 сентябрь куни соат 16.00 да бошланиши белгиланган. “Андижон” — “Қизилқум” жамоалари асосий таркиблари ўйини эса 12 сентябрда ўтказилади. Учрашув Андижон шаҳридаги “Соғлом авлод” стадионида соат 17.00 да бошланади.
