Ҳар йили “Бунёдкор” футбол мактабига ёш болакайлар қабул қилинади.

Ҳозирда футбол мактабига 2008 ва 2009 йилларда таваллуд топган болалар қабул қилинмоқда. Ота-оналардан тушаётган баъзи бир саволлар юзасидан футбол мактабимизнинг энг тажрибали мураббийларидан бири Баҳодир Тошмуҳаммедовга мурожаат этдик.

- Янги гуруҳларга ёш болаларни қабул қилиш жараёни қандай?
- Август ойи охирларида 2009 йилда туғилган болаларнинг ота-оналаридан аризалар туша бошлади. Сентябрдан эса гуруҳ очилиб, машғулотлар бошланди. 2008 йилда туғилганлар эса икки йилдан бери шуғулланиб келишмоқда.

- Футбол мактабига кириш учун қандай хужжатлар талаб этилади?
- Туғилган ҳақидаги гувоҳнома ва шифокорларнинг руҳсатномаси (У-086).

- Машғулотларга қатнайдиган болалар қандай кийимда бўлишлари керак?
- Оқ футболка, қора шорти, оқ гетри ва спорт пойабзали.

- Машғулотлар қайси кунлари олиб борилмоқда?
- Машғулотлар ҳафтасига уч марта ўтказилмоқда: сешанба, пайшанба ва шанба кунлари. 2009 йилда туғилганларга эрталабдан 7:15да машғулот олиб борилади. 2008 йилда туғилганлар эса ҳафтанинг худди шу кунлари фақат соат 13:15дан бошлаб шуғулланадилар.

- Болаларга қандай талаблар қўйилади?
- Янги келган болалар билан дастлабки икки ой давомида ҳеч қандай талабларсиз машғулот ўтказамиз. Фақатгина соғлиқ, машғулотга хоҳиш, ва тартиб-интизомга амал қилишга бўлгани. Икки ой ўтгач, алоҳида кўрсаткичлар ва тезлик борасидаги сифатлар бўйича болалар сараланиб олинади ва машғулотларни давом эттиришади.

- Болаларга қандай шароитлар яратилган?
- “Бунёдкор” футбол мактабида замонавий талабларга тўлиқ жавоб берадиган барча шароитлар бор: табиий ва суъний қопламали майдонлар, кийим алмаштириш хоналари, машғулотда фойдаланиш учун алоҳида анжомлар ва х.к.

- Қабул ўқув-йили бошланиб бўлгач тугадими ёки ҳозир ҳам машғулотларга қўшилиш имконияти борми?
- 6-7 ёшли болалар учун ҳар икки ойда қабул бўлади. Кейинги тўрт ой учун қабул кунларини аниқ келтириб ўтишим мумкин:
2015 йил, 30-31 октябрь
2015 йил, 25-26 декабрь
2016 йил, 26-27 февраль
2016 йил, 29-30 апрель
ушбу саналарда соат 9:00 дан 10:00 га қадар ота-оналарни футбол мактабимиз биноси олдида кутамиз.

- Бир гуруҳда нечта бола шуғулланади?
- Ушбу ёшдаги гуруҳларимизда болалар жудаям кўп. Шунга яраша мураббийларимиз ҳам бор. Ҳар 8-10та болага алоҳида мураббий бириктирилган.

- Ота-оналар ўзларини қизиқтирган бошқа саволларига жавоб олиш учун Сиз билан қандай боғлана олишади?
- Футбол мактабимизга учрашишлари ёки +99890 1676520 рақамга қўнғироқ қилишлари мумкин. (Илтимос, қўнғироқлар фақат иш вақтида бўлсин – матбуот хизмати қўшимчаси)

Футболни севувчи болажонларни “Бунёдкор” футбол мактабига таклиф этамиз!