Аввал хабар берганимиздек, Ўзбекистон ўсмирлар терма жамоаси Осиё чемпионати-2016 саралаш ўйинларида иштирок этади.

Саралаш босқичи қуръаси натижаларига кўра “А” гуруҳидан ўрин олган Темур Олимхўжаев жамоаси 16 — 20 сентябрь кунлари Фаластинда бўлиб ўтадиган учрашувларда Малдив, Фаластин ҳамда Яман терма жамоаларига қарши майдонга тушади.

Ушбу турнирга йўл олиш олдидан Ўзбекистон ўсмирлар терма жамоаси бош мураббийи Темур Олихўжаев мусобақага тайёргарлик жараёни қай тариқа кечгани, жамоа футболчилари ҳолати ва олдинга қўйилган вазифалар ҳақида тўхталиб ўтди.

“Мусобақага тизимли тарзда анча муддат давомида тайёрландик. Тошкентдаги йиғинлардан ташқари хорижда ҳам уч бора йиғин ўтказдик. Япония ва Хитойда ўртоқлик турнирларида иштирок этдик. Шунингдек, яқинда Қатарда ҳам қисқа муддатли йиғин ташкил этиб, уларнинг ўсмирлар терма жамоаси билан иккита ўртоқлик учрашуви ўтказдик. Бу ўйинларнинг ҳар иккисида ҳам ғалаба қозондик.

Умуман, бизга Ўзбекистон Футбол Федерацияси ва терма жамоалар маркази томонидан Осиё чемпионати саралаш босқичига тўлақонли тайёрланиш учун барча шароитлар яратиб берилди. Мана, ҳозирги пайтда тайёргарликнинг сўнгги босқичини Тошкентда олиб боряпмиз. 10 сентябрь куни жамоани сўнгги йиғтинга жалб этдик. Машғулотларимиз 13 сентябргача давом этади ва 14 сентябрда Фаластинга йўл оламиз.

Ҳозирги пайтда жамоанинг барча аъзолари мусобақага шай. Ҳеч кимда жароҳатлар йўқ. Йигитлар яхши спорт формасида. Олдимизга бу саралаш босқичида гуруҳда биринчи ўринни қўлга киритиш ҳамда келаси йили Ҳиндистонда бўлиб ўтадиган Осиё чемпионатига йўл олиш вазифаси қўйилган. Ўйлайманки, жамоамиз бу вазифани уддалай олади”, — дейди Темур Олимхўжаев.