“Насаф”-“Шўртан”(3:1) учрашувидан сўнг дастлаб меҳмонлар бош мураббийси Мухтор Қурбонов журналистлар саволларига жавоб бериб ўтди.

– Бугунги ўйинга бошқача тайёргарлик кўргандик. Афсуски, жамоалар ўртасидаги олдинга қўйилган мақсад бўйича фарқ борлиги кўриниб қолди. Гол урган бўлсак-да, ютқиздик

-Жамоангиз олдига қўйилган мақсад?

-Аслида кучли ўнликка кириш эди. Биз ҳар бир учрашувга ғалаба учун тушамиз. Кучли жамоалар билан ўйнаб бўлдик. Бундан кейинги жамоалар билан бемалол ўйнаса бўлади.

-Иккинчи даврада ўйинларингиз кучайгандек. Қандай эришдингиз?

-Биринчи даврадаги мағлубиятлар сабабини ўрганиб чиқдик ва маълум бўлдики, жисмоний тайёргарлик сусайганлигини англадик. Тактика бўйича ҳам кўпроқ ишладик ва ўсиш пайдо бўлди. Биринчи даврадаги хатолар бўлмаганда 5-6 ўринлар учун ҳам курашиб кўрардик.

-Биринчи даврада “Шўртан” жиддий қаршилик кўрсатганди, бугун аксинча?

-Бугун жамоамизни танимадим. “Насаф”дан ҳам кучли ўйин кутгандим. Ўйин темпи ҳам пас бўлди. Биз гол урганимиздан кейин “касаллик”ми билмадим, футболчилар ўйинни ташлаб қўяди. Бу камчиликни бартараф этиш устида ишлаяпмиз.

-Ғузордаги ўйинларни кечроқ бошлашни иложи йўқми?

-Биз ўзаро келишган ҳолда илгарироқ қўямиз. Рақиб жамоа транспорти бўйича муаммо бўлмаслиги учун илгарироқ бошлаймиз. Ўйинларни кечроқ ўтказиш бўйича ҳам имкониятимиз бор.

-Ботир Қодирқуловнинг аҳволи ҳақида?

-Қодирқуловнинг соғлигида муаммо бор. Ҳиндистонда операция бўлиб қайтди. Оддий ҳолатда оёғини яна синдириб олди.

-Келажакдаги режаларингиз? Қашқадарёда водийлик иккинчи Баҳром Ҳакимов бўлиш орзуйингиз борми?

-Орзуйим халқ ҳурмат қилишини хоҳлайман. “Шўртан”ни қўлдан келгунча юқори марраларга бошлаб бориш асл мақсадим.

-Ўзбекистон кубоги финалида кимлар ўйнайди? Мутахассис сифатида фикрингизни билдирсангиз

-Абрамов кубок финали учун курашни тўхтатмаган менимча, финалга “Насаф” чиқса керак. Имкониятлар 70/30

Олим ТОЛИПОВ ёзиб олди.