“Бунёдкор” – “Пахтакор” учрашувидан кейинги матбуот анжуманида биринчи бўлиб “шерлар” устози иштирок этди.

- Жавоб учрашувига фақат ва фақат ғалаба илинжида келгандик. Мақсадимиз иккита тўп фарқи билан ғолиб чиқиш эди. Афсуски, ўйлаган режаларимиз амалга ошмади. Ўйиннинг дастлабки 15 дақиқасида яхши ҳужумлар ташкил этдик. Бироқ гол ура олмадик. Агар гол ура олганимизда балки мақсадимиз амалга ошармиди... Қолаверса, марказдаги етакчимиз Кахи Махарадзенинг кутилмаган жароҳатга йўлиқиши ҳам панд берди. “Бунёдкор” иккала ўйинда ҳам ғолиб чиқди ва финалга муносиблигини намойиш қилди. Фурсатдан фойдаланиб, “Бунёдкор”ни ғалаба билан табриклайман. Бир нарсани яширишнинг ҳожати йўқ. “Локомотив” билан қийин ўйиндан кейин яхши тиклана олмадик. Футболчиларимизда чарчоқ аломатлари борлиги сезилди, - дейди Нўъмон Нурматович.