Испания чемпионатининг 4-тури доирасида "Реал" ўз майдонида камтаргина "Гранада"ни қабул қилди ва катта қийинчилик билан ғалаба қозонди. Мазкур ғалабада ҳакамлар хатосининг ўрни ҳам бўлди.

"Гранада" гранд клубга қарши жуда яхши ўйин намойиш қилди. Ўйиннинг 20-дақиқасида Исаак Саксес томонидан киритилган голни ҳакамлар офсайд дея баҳолаб, инобатга олишмади. Ваҳоланки, тўп узатилаётганда ҳужумчи офсайдда эмасди. Бундан ташқари, меҳмонлар ҳужумчилари камида яна 3 марта бирга бир вазиятга чиқишди, аммо дарвозани ишғол қилишмади. Бир ҳолатда Саксеснинг зарбаси ноаниқ чиққан бўлса, икки марта Кейлор Навас жамоасини голдан қутқарди.

Ўз навбатида "Қироллик клуби" ҳам кўп имкониятларни кўкка совурди. Бензема, Иско ва Роналду қулай вазиятлардан фойдалана олишмади. Рақиб посбони Андрес Фернандес яхши ўйин намойиш қилганини таъкидлаш лозим. Ўйиндаги ягона гол эса иккинчи бўлим бошида киритилди. Исконинг чап қанотдан берган узатмасини Карим Бензема бош билан яқин масофадан дарвозага жойлаб қўйди.

Ушбу гол учрашувда ягона бўлиб қолди. Криштиану Роналдуга фаолиятидаги 500-голини уриш мазкур баҳсда насиб қилмади. "Реал" эса ўз очколарини 10тага етказиб, камида эртагача 1-ўринга кўтарилиб олди.

Испания Ла лигаси, 4-тур
"РЕАЛ" - "ГРАНАДА" - 1:0
Гол: Карим Бензема (55)
Реал Мадрид – Навас, Пепе, Марсело, Карвахаль, Варан, Модрич, Кроос (Ковачич, 62), Иско (Каземиро, 85), Васкес, Роналду, Бензема (Черышев, 77).
Гранада – Фернандес, Дория, Бираги, Лопеш, Ломбан, Крхин, Маркес, Мендес (Лопес, 77), Рочина (Рико, 67), Эл-Арабий, Саксесс (Ибаньес, 61).
Огоҳлантиришлар: Мендес (35), Иско (43), Маркес (70), Крхин (80).