“Бавария” бош мураббийи Хосеп Гвардиола “Манчестер Юнайтед”ни Алекс Фергюсон тарк этган вақтда яъни 2013-йилда “Қизил иблислар” устози бўлишни истамаган, деб хабар бермоқда The Telegraph ахборотига асосланиб Sports.ru.

Шотландиялик собиқ мураббийнинг янги таржимайи ҳолида Гвардиоланинг “МЮ” бошқариши мумкин бўлган номзодлар рўйхатида биринчи бўлгани таъкидланган.

Аммо испаниялик мутахассис якунда “Бавария”ни қабул қилиб олди, “МЮ” бошқаруви эса Дэвид Мойесга топширилди.

“Гвардиола билан 2012-йилда бирга кечки овқат танаввул қилгандим, аммо ўша вақтда унга бу таклифни очиқ айта олмагандим, сабаби ҳали футболдан кетиш ҳақида бир тўхтамга келиб улгурмагандим.

У “Барселона” билан кўплаб совринларни қўлга киритди ва мен унинг мухлисига айлангандим. Пепга бошқа клуб таклифини қабул қилишдан аввал менга қўнғироқ қилишини сўрагандим, бироқ у 2013-йил июлида “Бавария”ни қабул қилиб олишидан аввал мен билан боғланмади”, – дейилган Фергюсоннинг таржимайи ҳолида.