Ҳозирги пайтдаги Муборакнинг “Машъал” жамоасининг ташкил бўлишида асосий ташаббускорлардан бири бўлган Баҳром Вафоевнинг жамоани ташкил бўлишида кўрсатган саи-ҳаракатлари ҳамиша мубораклик футбол ишқибозларининг хотирасида муҳим ўрин тутади.
Айнан ашаддий футбол ишқибози ва ўша пайтлар Муборак технологик транспорт ва махсус техникалар корхонасининг раҳбари бўлиб ишлаган Баҳром Вафоев ўз сафдошлари билан “Машъал” жамоасига 1982 йили асос солган. У кишининг ташаббуси ва сафдошларининг қўллаб-қувватлаши эвазга ҳозирги пайтдаги “Б.Вафоев” номидаги стадион ҳам илк марта ҳашар йўли билан барпо этилган эди.
Муборакнинг “Машъал” жамоаси раҳбарияти яна бир хайрли ишга қўл урди. Раҳбарият томонидан ушбу футбол жонкуяри – марҳум Баҳром Вафоев хотирасига бағишлаб, 2002 йилда туғилган футболчи ўсмирлардан ташкил топган жамоалар ўртасида Республика хотира турнири ўтказиладиган бўлди.
Хотира турнири 5-10 октябрь кунлари Муборак шаҳрида бўлиб ўтади. Ҳозирги пайтларда хотира турнири иштиркчиларига мамлакатимиз бўйлаб, ташкилотчилар томонидан таклифномалар жўнатилмоқда.
Фахриддин Чориев.
