Бугун Чемпионлар лигасининг "Е" гуруҳида БАТЭ ва "Рома" жамоалари ўзаро рақиб бўлишади.
Биринчи турда "Рома" ўз майдонида амалдаги чемпион "Барселона" билан 1: 1 ҳисобидаги дурангга имзо чеккан бўлса, БАТЭ сафарда "Байер"га 1: 4 ҳисобида имкониятни бой берган эди.
Мазкур клублар шу кунга қадар бирор маротаба ҳам ўзаро рақиб бўлишмаган.
Беларус клуби ўз тарихида бешинчи маротаба Чемпионлар лигаси гуруҳ босқичида иштирок этмоқда. БАТЭ ҳозирга қадар ЧЛда ўтказган 19 ўйинининг 2 тасида ғалаба қозонган. Эътиборли томони улардан бири "Бавария" устидан эришилган.
"Рома" эса ЧЛдаги юбилей 10-мавсумини ўтказмоқда. Римликлар охирги 5 мавсумнинг 4 тасида гуруҳдан чиқиш вазифасини уддалашган.
"Бўрилар"нинг турнирдаги энг юқори натижаси 1983/84 йилги мавсумга тўғри келган. Ўшанда Рим клуби финалга қадар етиб бориб, ҳал қилувчи баҳсда "Ливерпуль"га пенальтилар сериясида имкониятни бой берган эди.
Бугунги баҳсда "Рома"нинг имконияти юқори. Бироқ БАТЭ ўз майдонида осонликча таслим бўлмаслиги аниқ.
