Қозоғистон футбол тарихида Европа чемпионлар лигаси гуруҳ босқичидаги дастлабки очко қўлга киритилди. "Астана" ўз майдонида Туркиянинг "Галатасарой" жамоаси билан жанговар дурангга имзо чекди — 2:2.

Таркибида Уэсли Снейдер каби маҳоратли футболчиларни жамлаган тажрибали туркияликлар биринчи бўлимда ҳисобни очишди. Иккинчи бўлимда мезбонлар таваккал қилиб олдинга ўтишди ва бирин-кетин хавфли вазиятлар ярата бошлашди. Уларнинг уринишлари 76-дақиқада ўз самарасини берди. Истанбулликлар ҳимоячиси сунъий қопламали майдонда сирпаниб йиқилиб тушди ва Кабананга қанот узатма берган пайтда тўп Болтга тегиб, тўрга бориб тушди.

Ҳисоб тенглашганидан кейин астаналиклар ҳимояга ўтиб олишди. Бунинг учун "Галатасарой" рақибни жазолади. Тўп чап қанотдан дарвозабон майдончасига етказилди. Посбон Эрич тўпни қайтаришда техник хатога йўл қўйди ва тўп унинг қўлидан тўрга бориб тушди. "Астана" дарҳол ҳужумга ташланди ва ўйин тугашига 1 дақиқа қолганида ҳисобни тенглаштирди. Қанотдан етказилган узатмани Фернандо Муслера мушти билан уриб юборди, Каньяс эса жарима майдончаси чизиғи устидан бош билан зарба йўллаб, дарвозани ишғол қилди.

Гуруҳ босқичининг дастлабки 2та туридан кейин "Астана" ва "Галатасарой" клублари 1 очко билан 3 ва 4-ўринни эгаллаб туришибди.

ЕЧЛ, 2-тур
Астана Қозоғистон – Галатасарой Туркия 2:2 (0:1, 2:1)
Голлар: 0:1 – 31 Киса, 1:1 – 77, автогол Болта, 1:2 – 86, автогол Эрич, 2:2 – 89 Каньяс.
Астана – Эрич, Илич, Постников, Аничич, Шомко, Каньяс, Жолчиев (Нусербаев, 77), Жуков (Щеткин, 89), Максимович, Кетевоама (Мужиков, 82), Кабананга.
Галатасарой – Муслера, Денайер, Кайя, Балта, Кароль, Инан, Киса (Гюмюш, 82), Подольски (Родригес, 68), Снейдер, Ўзтекин (Сариоглу, 90), Булут.
Огоҳлантиришлар: Инан (42), Гюмюш (90).