Хабар берганимиздек, Самвел Бабаян устозлигидаги Ўзбекистон миллий терма жамоаси 8 октябрь куни Жаҳон чемпионати-2018 иккинчи саралаш босқичи, 5-тури доирасидаги Бахрайнга қарши майдонга чиқади.

Бугундан бош жамоамиз мазкур ўйинга тайёргаликка киришди. “Жар” стадионида ўтказилган машғулотларда тўлиқ таркиб иштирок этмади. Боиси бир қатор легионерлар ўз жамоалари сафида ўйин ўтказишлари боис кечроқ йиғинга қўшилишади.

Ҳозирча дастлабки кунги машғулотларда легионерлардан Сервер Жепаров, Анзур Исмоилов ҳамда Азиз Ҳайдаровлар иштирок этишди. Қолганлар эса эртадан кела бошлашади. Сардор Рашидовнинг терма ихтиёрига 4 октябр куни келиб қўшилиши кутилмоқда. Қолаверса, яқинда жароҳат олган Виталий Денисовнинг ҳам тез орада етиб келиши кутилмоқда.

Таъкидлаб ўтамиз, терма жамаомизнинг бу галги йиғинига хорижда тўп сураётган футболчиларимиздан яна Фозил Мусаев, Санжар Турсунов ва Одил Аҳмедовлар ҳам таклиф этилишган.