Бугун Қатар пойтахти Доҳа шаҳри бокс бўйича катталар ўртасида ўтказиладиган XVIII жаҳон чемпионатининг тантанали очилиш маросими бўлиб ўтади.

Мазкур жаҳон чемпионатида қитъавий саралаш мусобақаларидан муваффақиятли ўтган жами 260 нафар (Европадан – 94 нафар, Осиёдан – 66 нафар, Шимолий ва Жанубий Америкадан – 51 нафар, Африкадан – 32 нафар, Океаниядан – 17 нафар) чарм қўлқоп усталари совринли ўринлар ҳамда 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмалари учун кураш олиб борадилар.

Дунёнинг етакчи боксчилари иштирокида ўтадиган мазкур жаҳон чемпионатида Ватанимиз шарафини Ҳасанбой Дўсматов (-49 кг), Шахобиддин Зоиров (-52 кг), Муроджон Аҳмадалиев (-56 кг), Элнур Абдураимов (-60 кг), Фазлиддин Ғоипназаров (-64 кг), Бектемир Мелиқўзиев (-75 кг), Элшод Расулов (-81 кг), Рустам Тўлаганов (-91 кг) ва Баҳодир Жалолов (+91 кг) ҳимоя қиладилар.

Мусобақалар 6 октябрдан бошланиб, ҳал қилувчи финал баҳслари 15 октябрь куни ўтказилади.