Хабарингиз бор, Самвел Бабаян бошчилигидаги Ўзбекистон миллий терма жамоаси 8 октябрь куни Жаҳон чемпионати-2018 иккинчи саралаш босқичи, 5-тури доирасидаги Бахрайнга қарши ўйин ўтказади.

13 октябр эса тақвимда ФИФА куни сифатида белгиланган ва кўплаб мухлис-у мутахассислар бош жамоамизнинг шу санада бирор термага қарши ўртоқлик ўйини ўтказишини кутаётган эди. Аммо терма жамоалар маркази директори Асқар Толибжоновнинг айтишича, бу куни миллий терма жамоамиз ҳеч қандай ўртоқлик учрашуви ўтказмайди. Бу ҳақда Толибжонов СПОРТ ТВ орқали эфирга узатилган “Футбол шарҳи” кўрсатувида айтиб ўтди.

- Дастлаб 13 октябр куни бирор терма жамоага қарши ўйин ўтказишни режалаштираётган эдик. Аммо кейинчалик мураббийлар штаби билан келишган ҳолда бундай қилмасликка қарор қилдик. Чунки 8-санада расмий ўйин ўтказиш ва 13-куни ҳам ўртоқлик ўйинида майдонга тушишни лозим топмадик. Қолаверса, 12 октябр куни Олий Лигада кўчирилган ўйинлар ўтказилади. 17 октябр санасига эса Кубок финали белгиланган. Шу ва бошқа сабабларни инобатга олган ҳолда бу сафар ФИФА кунидан фойдаланмасликка қарор қилдик, - дейди Асқар Толибжонов.