Замонавий футболда мухлислар клуби катта роль ўйнаётгани ҳеч кимга сир эмас. Ахир футбол мухлислар учун ўйналади. Бунга монанд равишда Ўзбекистон чемпионатида иштирок этаётган ҳар бир жамоа ҳам – ўз ишқибозлар клубига эга десак муболаға бўлмайди.

Йил бошида Қўқонда ҳам мана шундай мухлислар клуби ўз фаолиятини бошади ва бугунги кунга келиб, барчанинг ҳавасини келтирмоқда.

Мухлислар клуби вакиллари кўп ҳолларда жамоанинг машғулотларини ҳам кўзатиб боришмоқда. Футболчиларга далда бўлишмоқда.

Қаҳрамон Исроилов ва Илҳомжон Қундузов бошчилик қилаётган “Қўқон-1912” мухлислар клуби жамоани қўллаб-қувватлаш мақсадида сафар ўйинларига доим бораётгани жамоага қўшимча куч бахш этаётгани аниқ. Мухлислар клуби аъзоларининг Бухорогача боришгани таҳсинга сазовор. Ўз навбатида мухлисларга клуб томонидан ҳам қулайликлар яратиб берилмоқда. Қўқонда азалдан футболни севишади. Бу ердаги ишқибозлар республикада етакчилар қаторида тилга олинади, десак хато бўлмайди.

– Барчасини яхши ташкил этганимиз боис, сафарга бориб келишда қўқонлик мухлис муаммога дуч келишмаяти, дейди Илҳомжон Қундузов. – Йил бошида мухлислар клуби билан маслаҳатлашган ҳолда ишга киришганмиз. Ўшанда мақсадимиз – Қўқонда ишқибозлик маданиятини ижобий маънода кўрсатиб қўйиш эди. Бунга эришдик деб ўйлайман. Ҳар ҳолда, сафимиз кундан-кунга кенгайиб бормоқда. Бошқа жамоалардаги мухлислар клуби вакиллари биз билан ҳамкорлик қилишга интилишмоқда. Қўқонга келган мухлислар клуби аъзолари бу ерда хурсанд ҳолда кетишларини таъминлаяпмиз.

Барчамизни ниятимиз битта – жамоамизни яхши ва ёмон кунларида ҳар томонлама қўллаб-қувватлаб, далда бўлиш. Мухлислар клуби ташкил топганидан кейин жонбозлик кўрсатиб келаётган ашаддий мухлисларга ўз миннатдорчилигимни изҳор этмоқчиман. Айнан уларнинг саъи-ҳаракатлари эвазига бир қатор режалар тузиб, ривожланиш сари одимлаяпмиз. Ҳеч қачон “Қўқон-1912”ни ёлғизлатиб қўймаймиз. Биз доимо сен билан бирга “Қўқон-1912”, деб сўзини якунлади Илҳомжон Қундузов.

Чиндан ҳам “Қўқон-1912” жамоаси мухлислар учун ўйнайди. Уларга хурсандчилик улашиш барчанинг мақсадидир. Ўз навбатида мухлислар клуби жамоанинг бир бўлагидир.