Барчага маълумки, 17 октябр шанба куни Жиззахдаги “Суғдиёна” марказий стадионида “Бунёдкор” ва “Насаф” жамоалари иштирокидаги Ўзбекистон Кубоги финал учрашуви бўлиб ўтади.

Финал иштирокчилари сафида Сурхондарё воҳасининг Шомуродовлар сулоласи вакиллари Илҳом Шомуродов (“Насаф”) ва Элдор Шомуродов (“Бунёдкор”)лар фаолият юритишмоқда.

Ушбу иккала ҳужумчи ўз жамоаларининг дастлабки таркибида доимо майдонга тушиб келишмоқда, финал учрашувида ҳам уларнинг майдонга тушишига шубҳа қилмаса ҳам бўлади.

Шундай экан, ушбу сулола вакилларининг  қайси бири финалда қаҳрамонга айланар экан? Бизга шуниси қизиқ! Агар Шомуродовларнинг кичигигa эътибор қаратсак, Элдорнинг маҳорати борган сайин ошиб бормоқда, у “Бунёдкор”нинг ютуқларига,  урган голлари билан ҳиссасини қўшиб келяпти.

Шомуродовларнинг каттаси эса, “Насаф”нинг муҳим учрашувларида доимо жонига аро киради. У муҳим учрашувларда гол киритиши билан алоҳида ажралиб турадиган ҳужумчи ва катта тажрибага эга футболчи ҳисобланади. Шундай экан, финалда яна катта Шомуродовнинг анъанаси давом этишини ҳоҳлардик.

Фақат кичик Шомуродов гапимиздан хафа бўлмаса бўлди. У бундан кейин ҳам қаҳрамон бўлишга улгуради деган, умиддамиз.

Дилшод Сафаров