Миллий чемпионатимизнинг секин-асталик билан ривожланаётгани айни ҳақиқат.

Дейлик, сўнгги йилларда совринли ўринлар учун борадиган курашга ҳам анча музмун кирди. Бироқ камчиликлар ҳали етарли. Айтайлик, айрим клубларимизни либосларига қараб, таниб олиш қийин. Ваҳоланки, улар бир неча йиллардан буён олий лигада иштирок этяптилар. Аксар клубларимизга тегишли экипировкада рамз, ўйинчилик рақами ва Joma белгисини кўрасиз. Улар бир қарашда терма жамоаларимиз либосини эслатиб юборади. Агар ўйинни телеэкран қаршисида томоша қилсангиз, шарҳловчи жамоалар номини айтмагунча уларни ажратиб олиш муайян вақт талаб этади. Ахир лоақал ўзгача дизайн танлаб, либослар олдига клуб номини ёзиб қўйиш мумкин-ку. Яна Европага қараймиз. Тўғри, у ерда реклама берувчилар кўп. Аммо жамоалар дизайнга ҳам алоҳида эътибор қаратишади. Қисқаси, формалардаги қандайдир ноодатийлик мухлисларни ўзига тортади. Мисол учун, «Барселона»нинг аввалги либосида ҳеч қандай реклама ёзуви йўқ эди, аммо у нимаси биландир диққатни тортарди. Шунинг учунми, мухлисларда хориж клублари либосларига қизиқиш зўр, уларни кийишга хоҳиш кучли. Биз ўз жамоаларимизни ҳам барча жиҳатларда олдинга юришларини истаймиз. Футболимиз истиқболи янада нурли бўлаверсин. Асосийси, олий лигада чемпионлик кураши сўнгги дақиқаларгача давом этсин. Шунинг баробарида ҳар бир клубимиз ўз имиджини яратсин.

Рустам Рустамов, rtyuiio@rambler.ru.