Бугун, 21 октябрь куни Европа Чемпионлар лигаси мусобақасининг гуруҳ босқичида 3-тур учрашувларига давом эттирилади.
Чоршанба оқшомида 4та гуруҳда (А, В, С ва D) 8та учрашув ўтказилади.
ПСЖ - Реал
Бугунги оқшомнинг марказий учрашуви Париж шаҳрида, А гуруҳи вакиллари "ПСЖ" ва "Реал" ўртасида ўтказилади.
Бу ўйингача ҳар икки жамоа 6тадан очко тўплаган ва бугунги ўйин гуруҳ етакчиси номига ойдинлик киритиши кутилмоқда.
Мезбонлар сафида Давид Луис, меҳмонлар сафида эса Карвахаль, Хамес Родригес, Пепе, Бензема, Бейл каби қатор етакчи футболчилар бу ўйинни ўтказиб юборишади.
Мальме - Шахтёр
Ўтказилган 2 турда биронта очко ишлай олмаган 2 аутсайдер ўртасидаги тўқнашув Норвегияда, "Мальме" ва "Шахтёр" жамоалари иштирокида бўлиб ўтади.
В гуруҳи
ЦСКА - Манчестер Юнайтед
Бугунги ўйинлар орасида энг кўп қизиқишларга сабаб бўлаётган ўйинлардан бири Москвада бўлиб ўтади. Ўз чемпионатида жорий мавсумда ҳали мағлубиятга учрамаган ЦСКА ва АПЛда учинчи ўринда кетаётган "МЮ" жамоасининг имкониятлари бу ўйинда тенг деб баҳоланмоқда. "МЮ" сафида Шоу, Янг, Макнейр, Уилсон каби футболчилар жароҳат туфайли майдонга туша олишмайди.
Вольфсбург - ПСВ
В гуруҳининг 4 вакили ҳам бир хил, 3тадан очко жамғарган. Германиядаги "Вольфсбург" ва "ПСВ" жамоалари баҳси ҳам тенг курашлар остида ўтиши кутилмоқда.
Мезбонлар сафида Кнохе ва Фелипе, меҳмонлар сафида эса Лестьенн, Виллемс, Йозефзоон, Кох каби футболчилар жароҳат туфайли ўйинни ўтказиб юборишади.
С гуруҳи
Атлетико - Астана
Қозоғистоннинг "Астана" клуби Мадридда "Атлетико" меҳмони бўлади.
Қозоқлар бу ўйинга иккинчи таркиб билан боришган.
Диего Симеоне бу ўйин олдидан ўтказилган матбуот анжуманида "Астана" ўзини ҳайрон қолдираётгани ҳақида айтиб ўтган.
Галатасарай - Бенфика
С гуруҳининг иккинчи учрашуви "Галатасарай" ва "Бенфика" ўртасида ўтказилади. Турклар ҳисобида шу вақтгача атиги битта очко бор, "Бенфика" эса ҳали очко йўқотмаган.
D гуруҳи
Ювентус - Боруссия Менхенгладбах
"Ювентус" ички чемпионатда омадсиз иштирок этаётган бўлсада, бу жамоа ЕЧЛни яхши ўтказмоқда. Икки турни ҳам ғалаба билан якунлаган туринликлар бу турда гуруҳнинг энг кучсиз жамоаси "Боруссия М"ни қабул қилади.
Манчестер Сити - Севилья
"Манчестер Сити" бугун мухлислари қаршисида "Севилья"ни кутиб олади. Бу ўйинда жамоа Агуэро, Сильва, Коларов каби етакчиларисиз ҳаракат қилишга мажбур.
