Хабарингиз бор, “Узрепорт ТВ” телеканали орқали Европа Чемпионлар лигасининг ўйинлари “жонли” эфирда намойиш этилмоқда.

3-тур ўйинларини шарҳлаб бориш учун Россиянинг таниқли спорт журналисти Денис Казанский ташриф буюрди. У мамлакатимиздаги футбол мухлислари билан яқиндан танишиш ва фикр алмашиш мақсадида бир гуруҳ фанатлар билан учрашув ўтказди.

Футбол мухлисларига яхши маълумки, Денис Казанский Англиянинг “Манчестер Юнайтед” клуби мухлиси ҳисобланади. Шу сабабли “Узрепорт ТВ”нинг анжуманлар залида “Манчестер Юнайтед” мухлислари билан ўтган учрашув Казанский учун ҳам жуда қизиқарли тарзда ўтди.

Мухлислар таниқли спорт шарҳловчисига Европа Чемпионлар лигаси, Англия футболи, жумладан, “Манчестер Юнайтед” клуби ҳақида ўзларини қизиқтирган саволлар билан мурожаат қилиб, унинг фикрлари билан қизиқишди. Шунингдек, суҳбат давомида шарҳловчилик касби мавзусига ҳам тўхталиб ўтилди.

Казанский шарҳловчилик касбининг ўзига хос томонлари ҳақида фикр юритар экан, ўзининг фаолиятида рўй берган қизиқарли воқеалардан мисоллар келтириб ўтди.

Ўзларининг севимли шарҳловчилари билан бўлиб ўтган мазкур учрашув ўзбекистонлик футбол мухлисларида катта таассурот қолдириб, улар учун унутилмас воқеага айланиши табиий.

Учрашув сўнггида мухлислар Денис Казанскийга миллий қадриятларимиз акс этган эсдалик совғалар тақдим қилишди ва биргаликда фанатлар қўшиғини куйлашди.