Яна тўртта турдан сўнг, Ўзбекистон XXIV  миллий чемпионати олий лига жамоалари баҳсларига якун ясалади.

Тақвимга кўра, йигирма еттинчи тур ўйинлари 25 октябрь куни бошланади. Шу куни мухлислар «Қўқон-1912» (Қўқон) – «Металлург» (Бекобод), «Шўртан» (Ғузор) – «Машъал» (Муборак) жамоалари учрашувига гувоҳ бўлишади.

Қолган бешта учрашув эса 26 октябрда ўтказилиши белгиланган. Унда «Бухоро» (Бухоро) – «Навбаҳор» (Наманган), «Олмалиқ» (Олмалиқ) – «Нефтчи» (Фарғона), «Қизилқум» (Навоий) – «Локомотив» (Тошкент), «Насаф» (Қарши) – «Бунёдкор» (Тошкент), «Пахтакор» (Тошкент) – «Динамо» (Самарқанд) жуфтликлари майдонга тушади.

Ўзбекистон Профессионал футбол лигаси Ҳакамлар қўмитаси қарорига мувофиқ, Навоийда бўладиган «Қизилқум»  – «Локомотив» жамоалари баҳсини ФИФА рефериси, пойтахтлик Бахтиёр Намозов бошқариб боради.

Унга лайнсменлар пойтахтлик Руслан Серазитдинов ҳамда Санжар Шоюсуповлар кўмаклашади.

Ёшлар лигаси доирасидаги учрашув бош ҳаками ва асосий таркиблар ўйини захира ҳаками этиб, қаршилик Комилжон Расулов тайинланган.

Учрашувларни Республика тоифасидаги ҳакам пойтахтлик Арслон Ҳотамов кузатиб боради.

Эслатиб ўтамиз, ёшлар лигаси учрашуви Кармана туманидаги “Қизилқум” ПФК қошидаги БЎФМ стадионида бўлиб ўтади. Учрашув 25 октябрь куни соат 15.00 да бошланади. «Қизилқум»  – «Локомотив» жамоалари асосий таркиблари баҳси эса 26 октябрь куни соат 17.00 да старт олади. Бу ўйин Навоийдаги “Сўғдиёна” стадионида ўтказилади.