Москванинг "Динамо" жамоаси раҳбарияти жамоа ўйинларини клуб телевидениеси орқали шарҳлаб борувчи журналист Дмитрий Дерунец билан ҳамкорлик қилишни тўхтатди.
"Динамо" клубида жамоанинг "Спартак"ка қарши ўйини танаффусида рўй берган воқеа, журналист Дерунецнинг рақиб жамоа мухлиси билан жанжаллашгани муҳокама қилинди.
Натижада, "Динамо" ўйинларини тв ва радио орқали трансляция қилишга масъул "Спорт БИТ" компаниясига Дерунецни ишдан бўшатиш бўйича кўрсатма бериш қарори қабул қилинган.
"Динамо" жамоаси футбол жамоатчилигидан бу хунук воқеа учун узр сўраган ва бундан кейин бундай воқеалар бўлмаслиги чоралари кўрилишини билдирган.
Эслатиб ўтамиз, «Спорт FM» радиоканали ва «Динамо-ТВ» канали шарҳловчиси бўлган таниқли журналист Дмитрий Дерунец «Динамо» жамоасининг «Спартак»ка қарши ўйини танаффуси вақтида рақибларнинг майдонга тушиб келган мухлисига ҳамла қилганди.
Бу жанжални стадион ходимларидан бири тўхтатиб, мухлисни ташқарига олиб чиққан, лекин журналист ўз ҳаракатларини давом эттириб, мухлиснинг ортидан келиб тепганди. Бу эса "Спартак" мухлисларининг ғазабини қўзғаган, улар журналистга турли буюмлар улоқтиришган.
Россия футбол уюшмаси раҳбари бу воқеага муносабат билдирар экан, Дерунецнинг футбол соҳасида ишламаслигини исташи ҳақида айтиб ўтган.
