Евро футболдан гапирамиз ва ёзамиз. Бугун ЕЧЛнинг 4-тур учрашувлари бўлиб ўтади. Унда диққатимиз марказида, албатта, “Реал Мадрид” ПСЖ қарама-қаршилиги биринчи ўринда бўлади. Бу беллашувдан ташқари, “Шахтер” – “Мальме”, “Манчестер Юнайтед” – ЦСКА, ПСВ – “Вольфсбург”, “Астана” – “Атлетико”, “Бенфика” – “Галатасарой”, “Боруссия М” – “Ювентус”, “Севилья” – “Манчестер Сити” ўйинлари ҳам қизиқиш уйғотиши аниқ.
"А" гуруҳи
00:45 “Реал М” – ПСЖ
Бу жамоаларнинг биринчи даврадаги ўйинида ҳисоб очилмаганди. Ўша учрашувдан мухлислар кўп нарса кутишганди. Лекин амалда кутилган ўйинни кузатганимиз йўқ. Энди бу гал ҳам мазкур беллашувдан мухлислар бошқача қаршиликни кутишмоқда. Қолаверса, “қироллик клуби”да жароҳат олганлар сафга қайтишди. Бу эса жамоани кучайтириши аниқ. Лекин парижликлар ҳам Мадридга шунчаки расмиятчилик учун келишмаслиги бор гап.
SPORTS.uz тахмини 55-45
00:45 “Шахтер” – “Мальме”
ЕЧЛнинг олдинги анонсимизда украиналикларнинг кучига анчагина юқори баҳо бериб юборганаканмиз, “Мальме” бизни уялтириб қўйганди. Чунки “Мальме” ўша ўйинда “Шахтер”ни мағлубиятга учратганди. Нафақат ғалаба қозонган, балки ўйин борасида ҳам меҳмонларга дарс бериб қўйганди. Энди бу гал “сариқ қоралар” ўз уйларида “Мальме”дан қасос олишни уддасидан чиқишармикан?
SPORTS.uz тахмини 55-45
"В" гуруҳи
00:45 “Манчестер Юнайтед” – ЦСКА
Ушбу жамоаларнинг биринчи учрашувида икки таймда 2 хил ўйин гувоҳи бўлгандик. Биринчи бўлимда майдон эгалари устунроқ ҳаракат қилишган бўлса, иккинчи таймда “МЮ” вазиятни ўз томонига оғдира олганди. Кўрамиз, бу сафар “қизил иблислар” рақиблари билан яна таймларни бўлишишармикин ёки…
SPORTS.uz тахмини 60-40
00:45 ПСВ – “Вольфсбург”
“Вольфсбург” ўтган мавсум Бундеслигада кўрсатган ўйинини намойиш эта олмаяпти. Лекин ЕЧЛ ҳавоси ёқиб қолган шекилли, турнир жадвалида 6 очко билан пешқадамлик қилмоқда. Бу беллашувга ҳам қизиқадиганлар етарлича топилади.
SPORTS.uz тахмини 45-55
"С" гуруҳи
20:00 “Астана” – “Атлетико”
“Астана” бош мураббийи асосий эътиборини ички чемпионатга қаратган. Ўз имкониятларига тўғри баҳо берган мутахассис мамлакат биринчилигидаги ўйинларга урғу берган ҳолда ЕЧЛнинг олдинги турида Мадридга етакчи футболчиларини олиб бормаганди. Қозоғистонликлар мураббийи энди қандай йўл тутади? Ўз майдонидаги учрашувда ҳам тажрибали ўйинчиларини асраб қўйиб, бошқаларга имконият яратиб берадими ёки йўқ, буниси эртага билиб оламиз.
SPORTS.uz тахмини 30-70
00:45 “Бенфика” – “Галатасарой”
“Галатасарой” ҳам бизни уялтириб қўйган жамоа ҳисобланади. Чунки олдинги учрашувда португалияликларнинг имкониятларини кўпроқ баҳолагандик. Лекин амалда… Шу боиз, махкур қарама-қаршилик футбол ишқибозларини чорлаши аниқ.
SPORTS.uz тахмини 50-50
"D" гуруҳи
00:45 “Боруссия М” – “Ювентус”
Ўтган йили ажойиб мавсумни ўтказган “Ювентус” бу йил А-сериада кўнгилдагидек иштирок этмаяпти. Лекин ЕЧЛнинг амалдаги финалчиси бу турнирда ҳам яхши натижалар қайд этмоқда. Фақатгина олдинги турда ўз уйидаги “Боруссия М” билан дуранг бундан мустасно. Кўрамиз, “Ювентус” туриндаги ҳисобни тасодиф эканлигини Германия исботлай олармикан?
SPORTS.uz тахмини 45-55
00:45 “Севилья” – “Манчестер Сити”
Манчестердаги беллашувда майдон эгалари қийин аммо муҳим ғалабани қўлга киритишганди. Аммо испанияликлар ҳали ўз сўзларини айтмадилар деб умид қиламиз. “Севилья” уйида бошқача ўйин кўрсатишини барча жуда яхши билади.
SPORTS.uz тахмини 50-50
Олий Лиганинг бизга беролмаган ўйинларини четдан излаймиз. Жамоалар қандай ҳисоблар қайд этишидан қатъий назар, сиз-у биз ҳамиша евро футболдан баҳраманд бўлишда давом этамиз.
