ФИФАнинг сўнгги қарорига кўра, шу йилнинг 5 ноябрь куни Саудия Арабистони терма жамоаси ЖЧ-2018 ва Осиё кубоги-2019 саралашининг 2-босқичи доирасида Рамаллоҳ шаҳрида Фаластин меҳмони бўлиши керак эди. Аммо С.Арабистони футбол ассоциацияси мазкур ўйинга ташриф буюришдан бош тортди ва бу ҳақда ФИФАга бугун, 3 ноябрь куни расмий мактуб йўллади. Бу ҳақда www.alriyadh.com сайти хабар тарқатди.

Манбага кўра, саудияликлар бунга сабаб сифатида футболчи ва делегациянинг хавфсизлигини келтиришган. Гап шундаки, Саудия делегацияси Фаластинга бориш учун Исроил ҳудудини кесиб ўтишига тўғри келади. С.Арабистони ва Исроил мамлакатлари ўртасидаги сиёсий қарама-қаршилик туфайли саудияликлар яхудлар чегераси ва ҳудудини босиб ўтишни исташмади.

Аслида Фаластин ва С.Арабистони термалари ўртасидаги ўйин 13 октябрь куни бўлиб ўтиши керак эди. Меҳмонлар юқоридаги сабабларга кўра ўйинни нейтрал майдонга кўчириш юзасидан ФИФАга мурожаат қилишди. Фаластин эса учрашувни бошқа мамлакатда ўтказишни истамади ва Саудия делегациясини Иорданиядан вертолётда олиб келиш вариантини таклиф қилди. Аммо бунга Арабистон жамоаси рози бўлмади. Натижада, ФИФА аввал ўйинни кейинроқ муддатга қолдирди ва Фаластин хавфсизликка кафолат берганидан кейин баҳс 5 ноябрь куни Рамаллоҳ шаҳрида бўлиб ўтиши ҳақида қарор чиқарилди. Бироқ, Саудия Арабистони ўйинга 2 кун вақт қолганида учрашувдан бош тортди.

ФИФА ва ОФК мазкур вазият юзасидан қандай қарор чиқариши ҳозирча номаълум. Энг енгил жазо — Саудияга техник мағлубият ва молиявий жарима бўлади, агар ФИФА терма жамоани саралаш босқичидан бутунлай чиқариб юбормаса.

Берт ван Марвейк шогирдлари гуруҳда 4та ўйиндан сўнг 12 очко билан 1-ўринни эгаллаб туришибди. Иккинчи ўринидаги БАА ҳисобида 7 очко бор (4та ўйиндан сўнг). Фаластин эса 5 очко билан 3-ўринни эгаллаб турибди. Саудияга қарши ўйин учун фаластинликларга техник ғалаба ёзилса, улар жадвалда 2-ўринга кўтарилиб олишади.