Ҳозирда Европа чемпионлар лигасининг гуруҳ босқичи баҳслари давом этмоқда. Ушбу ўйинларда биз бир неча кучли жамоаларнинг очко йўқотишига гувоҳ бўлдик. Лекин мусобақа тарихининг гуруҳ босқичларида умуман йўқотишга учрамай, барча учрашувларда мардонавор ғолибликка эришган жамоалар ҳам топилади. Қизиғи шундаки ушбу жамоаларнинг ҳеч бири якунда бош совринни қўлга кирита олмаган. Биз қуйида шундай натижа кўрсатган жамоалар ҳақида тўхталиб ўтамиз.

1.«Милан» 1992-1993



Чемпионлар лигаси номи остидаги ўтказилган дастлабки турнирда «Милан» жамоаси гуруҳда «Порту», «ПСВ Эйндховен» ва Швециянинг «Гётеборг» жамоалари билан баҳс олиб бориб якунда 6 ўйинни ўз фойдасига ҳал қилади. Кейинги босқичларда ҳам ғалабаларга эришган Миланликлар финал йўлланмасига эга бўлади. Мусобақанинг ҳал қилувчи учрашувида Марселнинг «Олимпик» жамоаси билан тўқнаш келган Фабио Капелло шогирдлари 0-1 ҳисобида имкониятни бой беришади.

2. «ПСЖ» 1994-1995



Таркибида Жорж Веадек ижрочиси бўлган «ПСЖ» фантастик ўйинлар кўрсатиб гуруҳда Москванинг «Спартак», Киевнинг «Динамо» ва Мюнхеннинг «Бавария» жамоалари билан учрашувларда максимал натижа қайд этади. Ярим финалга қадар ўзининг ғолибона юришини давом эттирган Париж жамоаси ушбу босқичда «Милан» тўсиғидан ўта олмайди.

3. «Спартак» 1995-1996

Ушбу рўйхатимиздан ўрин олган Европа даражасидаги ўртамиёна жамоанинг ушбу натижаси таҳсинга лойиқдир. Ҳозирда Россия клублари гуруҳ босқичидан аранг чиқаётгани бор гап. Лекин «Спартак»нинг ўша пайтда кўрсатган ўйинлари барчани ҳайратга солган эди. Гуруҳда Польшанинг «Легия» Норвегиянинг «Русенборг» ва Англиянинг «Блэкберн Роверс» жамоалари билан кураш олиб борган Москва жамоаси, барча ўйинларда рақибларини мағлубиятга учратиб ўзининг шонли юришларини кўрсатади. Лекин чорак финалда «Спартак» Франциянинг «Нант» жамоасига икки ўйин натижасига кўра 2-4 ҳисобида мағлуб бўлиб турнирни тарк этади.

4. «Барселона» 2002-2003



2002-2003 йилги мавсумда «Барселона» жамоаси дастлабки гуруҳ босқичида Белгиянинг «Брюге», Россиянинг «Локомотив» ва Туркиянинг «Галатасарой» жамоалари билан бир гуруҳдан жой олади. Бу босқичдан ўтиш Каталония клуби учун қийинчилик туғдирмайди. 6 учрашувнинг барчасида бирин-кетин ғалабаларга эришган «Барселона» турнирнинг чорак финалига етиб келади ва айнан ушбу босқичда Туриннинг «Ювентус» жамоаси томонидан тўхтатилади.

5. «Реал Мадрид» 2011-2012, 2014-2015


Мусобақа тарихида икки бор шундай натижага эришгаy ягона жамоа. Лекин уларнинг ҳар иккисида ҳам «Қироллик клуби» бош совринни қўлга кирита олмайди. Дастлаб 2011-2012 йилги мавсумда «Лион», «Аякс» ва Загребнинг «Динамо» жамоалари билан бўлган гуруҳ баҳсларнинг барчасида ғолиб бўлган Мадрид суперклуби, ярим финалда «Бавария»га имкониятни бой беради. Кейинчалик 2014-2015 йилги гуруҳ босқичи ўйинларида «Ливерпуль», «Базель» ва «Лудогорец» жамоаларига ҳеч қандай имконият қолдирмай яна бир бор ярим финалга қадар етиб келади. Бу сафар Туриннинг «Ювентус» клуби «Реал Мадрид»ни доғда қолдиради.