Самвел Бабаян бош мураббийлигидаги Ўзбекистон миллий терма жамоаси КХДР ва Яманга қарши баҳсларга тайёргарликни бошлади.

Бугундан бош жамоамиз пойтахтимизда йиғинга киришди. Машғулотлар одатдагидек “Жар” стадиони майдонида олиб борилди. Унда асосан миллий чемпионатимизда тўп сурувчи футболчилар иштирок этишди.

Дастлаб майдонда енгил югуриб олган футболчиларимиз ҳаво анча совуқ эканини инобатга олиб, чигалёзди машқларни тренажёр залида жисмоний тайёргарликлар бўйича мураббий назоратида олиб боришди.

Биласиз, терма жамоадан чақирув олган футболчиларимизнинг кўпчилиги кеча миллий чемпионат доирасида ўз жамоалари таркибида учрашувлар ўтказишган. Шу сабабдан бугун уларга жисмоний юкламалар бериб ўтирилмади.

Хорижий чемпионатларда тўп сурадиган легионерлардан эса Азизбек Ҳайдаров, Анзур Исмоилов ҳамда Сервер Жепаровлар бугунги машғулотда қатнашишди. Қолган легионерлар эса 8 ноябр кунига қадар терма жамоа ихтиёрига етиб келишади.

Бугун айниқса, Азизбек Ҳайдаров машғулотда анча “тер тўкди”.

Ислом Тўхтахўжаевнинг ҳам кайфияти ёмон эмас.

Таъкидлаб ўтамиз, Жаҳон чемпионати-2018 иккинчи саралаш босқичи H гуруҳи 7-тур ўйинлари доирасида Ўзбекистон миллий терма жамоаси 12 ноябрь куни КХДР термасига қарши баҳс юритад. Мазкур баҳс 12 ноябрь куни 18:00да Тошкентдаги "Пахтакор" марказий стадионида ўтади. 7-турда эса 17 ноябрь куни Яманга қарши сафарда ўйин ўтказилади.