Жаҳон чемпионати-2018 иккинчи саралаш босқичи H гуруҳи 7-тур ўйинлари доирасида Ўзбекистон миллий терма жамоаси 12 ноябрь куни КХДР термасига қарши баҳс юритишидан хабарингиз бор.
Айни кунларда Самвел Бабаян устозлигидаги бош жамоамиз пойтахтимизда йиғин ўтказмоқда. Йиғиннинг дастлабки тўрт кунида асосан миллий чемпионатимизда тўп сураётган футболчилар билан машғулотлар ўтказилаётган эди. Терма жамоа ихтиёрига легионерлардан фақат Азизбек Ҳайдаров, Анзур Исмоилов,Сервер Жепаров ва Фозил Мусаевлар етиб келишган эди.
Маълум бўлишича, терма жамоамиз бугундан тўлиқ таркиб билан машғулот ўтказади. Қатарнинг “Ал Жайиш” жамоаси шарафини ҳимоя қилаётган ҳамюртимиз Сардор Рашидов ҳам кеча бош жамоамиз қароргоҳига етиб келди ва бугундан машғулотларга қўшилади.
Таъкидлаб ўтамиз, Сардор Рашидов Қатар Юлдузлар Лигасининг 8-тур ўйинида “Месаимер” клуби дарвозасини икки бор ишғол қилди ва терма жамоа ихтиёрига яхши кайфиятда етиб келди.
