Аввал хабар бериб ўтганимиздек, www.championat.asia сайти ҳамда “Oreo” савдо белгиси ҳамкорлигида 2006 йилда туғилган болалар ўртасида футбол фестивали ўтказилмоқда.

Турнирда иштирок этаётган барча тўртта жамоа бир-бирлари билан ўзаро куч синашишади. Бугун фестивалнинг биринчи кун ўйинлари бўлиб ўтди. “Ёшлик” аренасида ўтган биринчи баҳсда “Локомотив” ва “Пахтакор” футбол мактаблари тарбияланувчилари баҳслашишди. Қизиқарли кечган баҳсда пахтакорчилар 2:0 ҳисобидаги ғалабани қўлга киритишди.

Шундан сўнг, иккинчи жуфтлик жамоалари – “Бунёдкор” ва “Спартак” ўзаро беллашишди. Ушбу учрашув ҳам йиғилганларда жуда яхши таассурот қолдирди. 2:0 ҳисобида “Бунёдкор-2006”га ғалаба келтирган баҳсда голларга Абдураҳим Исмоилов ва Азизбек Тўлқинбеков муаллифлик қилишди. Ушбу ҲАВОЛА орқали “Бунёдкор” – “Спартак” учрашуви фотожамланмаси билан танишишингиз мумкин.

Ўйин якунига кўра, Абдураҳим Исмоилов учрашувнинг энг яхши футболчиси, деб топилди.
Фестивалнинг иккинчи кун учрашувлари “Бунёдкор” футбол мактаби залида ўткзилади. Соат 10:00да бошланадиган биринчи ўйинда “Бунёдкор” ва “Пахтакор” тарбияланувчилари ўзаро куч синашишса, иккинчи баҳс “Спартак” ва “Локомотив” ўртасида кечади.